Opgestel deur die Podlitiek-span
Dr. Zweli Mkhize, voormalige minister van gesondheid. (Foto: Twitter)
In hierdie week se Podlitiek-episode bespreek die paneel die Digital-vibes skandaal, Zandile Gumede se oorwinning tydens ‘n onlangse ANC-leierskapsverkiesing en die MRK se veldtog teen Steve Hofmeyr.
Dr. Zweli Mkhize het verlede jaar as minister van gesondheid bedank weens die sogenaamde Digital Vibes-skandaal maar is hierdie week deur ‘n parlementêre komitee onskuldig bevind aan onetiese optrede. Die Podlitiek-paneel grou ‘n bietjie dieper, en bespreek die intriges agter die intrige.
Zandile Gumede, voormalige burgemeester van die eThikwini-munisipaliteit in Durban, sal in Julie op meer as 2 700 aanklagte van korrupsie in die hof verskyn. Ondanks haar beweerde korrupsie is sy as ANC-voorsitter in Durban verkies. Die Podlitiek-span wonder hoe ernstig die ANC werklik oor korrupsie is as sulke kandidate die kitaar in belangrike streke slaan, en wat dit vir pres. Cyril Ramaphosa se herverkiesing tydens die ANC-kongres in Desember gaan beteken.
Die Menseregtekommissie het hierdie week aangekondig dat hy vir Steve Hofmeyr gaan vervolg nadat hy opmerkings oor bestialiteit gemaak het, en die moontlikheid dat dit in die toekoms aanvaarbare praktyk sal wees. Die Podlitiek-paneel wonder hardop oor die doel en effektiwiteit van die MRK.
Luister gerus na hierdie week se Podlitiek om meer oor hierdie en ander stories te hore te kom!
- Die Podlitiek-span bestaan uit Paul Maritz, Daniël Eloff (Hurter Spies Ing.), Ernst van Zyl (AfriForum) en Frederik van Dyk.
