Opgestel deur die Podlitiek-span
Dr. Blade Nzimande, minister van hoër onderwys en opleiding. (Foto: Kopano Tlape/GCIS)
In die week se episode van Podlitiek ontnonsens die span die minister van hoër onderwys se drogredenasies oor Afrikaans by Stellenbosch asook die hofaansoek om die nasionale ramptoestand tot ’n einde te bring. Die span bespreek ook die stadsaal van Komani (Queenstown) wat onlangs afgebrand het en hoe ons die brande in Suid-Afrika moet blus.
Die gesprek skop af met Frederik wat minister Blade Nzimande se aanval op Afrikaans by tersiêre onderwysinstellings kontekstualiseer teen die breër gesprek oor moedertaalonderrig. Die feit dat Engels as alleen onderrigtaal aangeneem word onder die vaandel van transformasie in pleks van veeltalige moedertaalonderrig, word sterk gekritiseer en die teenstrydighede daarvan uitgewys.
Tweedens bespreek die span AfriForum, DearSA en Solidariteit se hofaansoek om die ramptoestand te beëindig. Die feit dat Suid-Afrika tans nie hoë vlakke van sterftes ervaar ten spyte van die vorige vlaag van Covid-19 nie, gee rede om te glo dat die nasionale ramptoestand nou sy vervaldatum bereik het.
Laastens draai die gesprek na die brande by die parlement asook die stadsaal van Queenstown. Dit word uitgewys dat albei die tragiese voorvalle gedeeltelik toegeskryf kan word aan swak onderhoud en wanbestuur deur ons owerhede. Die simboliek hiervan word ook bespreek en dit word uitgewys dat dit moeilik is om te bou, maar ongelukkig vreeslik maklik is om af te breek.
Podlitiek lewer nie die nuus nie, hulle maak dit. Luister Podlitiek.
- Die Podlitiek-span bestaan uit Paul Maritz, Daniël Eloff (Hurter Spies Ing.), Ernst van Zyl (AfriForum) en Frederik van Dyk.
@ laaste paragraaf:
verbasend hoeveel geboue brand deesdae, “sommer vanself”,
alle brande het skielik ontstaan vanaf 2008 af
kan nie dink dat die voor 1994 so bekend was nie
Nie die skerpste lem in die laai nie…..