Soorte resepte:

[Resep] Braaisous vir wors en pap

Foto: Lekker en Vinnig - Souse

Braaisous vir wors en pap. Foto: Lekker en Vinnig – Souse

Wat is braai nou sonder pap en sous? Hierdie sous is ʼn moet vir Saterdag se braai.

Lewer ± 1,5 liter

Bestanddele:

  • 30 ml olie
  • 2 groot uie, gekap
  • 2 knoffelhuisies, gekneus
  • 30 ml droë gemengde kruie
  • 410 g (1 blik) tamatiepuree
  • 60 g (1 pakkie) beesstert- of bruinuiesoppoeier
  • 500 ml kookwater
  • 470 g (1 bottel) vrugteblatjang
  • 30 ml suiker
  • paar druppels Tabascosous
  • varsgemaalde swartpeper na smaak

Metode:

  1. Verhit die olie en soteer die uie, knoffel en kruie tot die uie sag is.
  2. Meng die puree en soppoeier en roer dit by die uiemengsel sodat daar geen klonte is nie. Roer die kookwater by en verhit dit tot kookpunt.
  3. Voeg die blatjang, suiker en Tabascosous by en geur met peper. Laat prut die sous ʼn paar minute en voeg nog water by indien die sous te dik is na jou smaak.

Variasies

  1. Soteer sampioene of ʼn soetrissie saam met die uie.
  2. Vervang die water met suikervrye kola (Tab) vir ʼn interessante alternatief.
  3. Voeg 5-10 ml kerriepoeier of 15 ml aangemaakte korrelmosterd by die sous.
  4. Laat die sous nog langer prut tot dit verder ingedamp het en sit dit op hamburgers voor.

Wenk

Enige orige sous kan bevries word.

Bron: Lekker en Vinnig: Souse
Uitgewer: Lapa
Resep oorspronlik gepubliseer in Spogresepte, Suid-Afrikaanse Vrouelandbou-unie

Net soos ʼn pannekoek met die beste resep nog steeds kan flop, kan Maroela nie pa (of ma!) staan vir enige van die resepte wat jy self by die huis probeer nie. Elke koppie meel, bakpoeier, melk, eier of enige ander bestanddeel is dus in jou eie hande en Maroela Media kan nie enige verantwoordelikheid aanvaar vir komplimente (of klagtes) oor jou kookvernuf nie. -Red

Deel van: Bykosse

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Maria van Dieweeck ·

Mmm klink lekker, ek maak gewoonlik maalvleis bolognese as daar so n sous oorbly.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.