Water jou mond al?
8-10 porsies
Bestanddele
- 200 g donkersjokolade
- ½ k (115 g) Clover Springbok-botter
- 2 eiers
- ½ k (100 g) suiker
- 1 k (150 g) sagte bruinsuiker
- ½ k (50 g) pekanneute, in stukkies gebreek
- ¼ k (25 g) makadamianeute, grof gekap
- ¼ k (25 g) haselneute, gehalveer
- ⅔ k (125 g) koekmeel
- 1 t (5 ml) bakpoeier
- ¼ t (1 ml) sout
Metode
- Smeer ’n 12 x 20 cm- reghoekige oondpan en voer dit met bakpapier uit. Voorverhit die oond tot 180 °C.
- Plaas die sjokolade en botter in ’n hittebestande bak oor ’n kastrol met pruttende water. Maak seker dat die onderkant van die bak nie aan die water raak nie. Roer liggies tot die mengsel glad en gesmelt is. Laat vir 5 minute afkoel.
- Klits die eiers en suiker in ’n mengbak met ’n elektriese menger tot dit lig en romerig is. Vou die eiermengsel by die sjokolademengsel in.
- Vou die oorblywende bestanddele versigtig by die mengsel in.
- Skep die beslag in die voorbereide oondpan en bak vir 20 tot 30 minute. Verwyder uit die oond en laat vir 10 minute afkoel. Keer uit, verwyder die bakpapier en sny in skywe. Sit met roomys voor.
Bron: Gunsteling Poedings
Uitgewer: Lapa
Resep lyk heerlik, veral met daai neute in, gaan hom beslis probeer.
1/2 koppie suiker is 100gr en vol koppie is 150gr. Hoe kry mens daai som?
Dagsê Realis
Dankie vir jou navraag. Alhoewel dit so in die resep vervat is, stel ons voor dat jy net ’n halwe koppie witsuiker en 1 koppie bruinsuiker gebruik, aangesien die digtheid van die twee verskil. Sterkte, laat weet ons hoe dit proe!
Groetnis
Tania nms Maroela Media