SA sjef spog met gesogte restaurant-toekenning

Soorte resepte:

v.l.n.r. Kevin Grobler, die hoof-sjef, Jan-Hendrik met die Michelin-ster en Rutger Eysvogel, die sous-sjef. Foto: www.eatout.co.za

Jan-Hendrik van der Westhuizen, ŉ Suid-Afrikaanse sjef en restaurateur wat tans in Frankryk woon, het Maandag die gesogte Michelin-ster ontvang.

Restaurateurs ontvang dié gesogte toekenning wanneer die algehele belewenis van hul restaurant, waaronder die kos, dekor én die ervaring, van absoluut hoogste standaard is. Dit is dikwels ŉ bron van kompetisie tussen verskeie restaurante, en verseker dat ŉ restaurant ná jare lange harde werk in die kollig geplaas word. Dié ster word vergelyk met die Oscars van die rolprentbedryf.

Dit val egter nie elke Jan Rap te beurt nie. Die gewilde TV-sjef Gordon Ramsay het reeds altesaam nege Michelin-sterre verwerf vir al sy restaurante.

Van der Westhuizen se restaurant, Jan, bedien fynproewers met onder meer eg Suid-Afrikaanse disse wat deur sy ouma geïnspireer is. Dié voormalige inwoner van Middelburg spog met geregte soos mosbolletjies, Kaapse saadbrood, mossels, malvapoeding en biltong op sy spyskaart. Sy restaurant het plek vir slegs 28 mense op ŉ slag.

Sy restaurant is ook in 2015 in Condé Nast se lys van 18 toprestaurante in die wêreld aangewys.

Moet egter nie verwag dat jy sommer vinnig by Jan kan inloer vir ŉ maaltyd nie. Volgens die webwerf Businesstech sal ŉ ete vir twee mense jou ŉ geraamde R1 840 uit die sak jaag.

Besoek Jan se webwerf.