Boerewors is dalk lekker op die braai, maar dié vleis trek ʼn ander baadjie aan met hierdie gereg.
Lewer 6 porsies
Bestanddele
- bietjie olie
- 2 uie, gekap
- 1 rooi soetrissie, ontpit en in blokkies gesny
- 10 ml kerriepoeier
- 2,5 ml borrie
- 500 ml kookwater
- 30 ml blatjang
- 10 ml appelkooskonfyt
- sout en varsgemaalde swartpeper na smaak
- 5 ml gekapte vars pietersielie
- 700 g rou boerewors, in groot stukke gesny
- 410 g (1 blik) perskeskywe, gedreineer
- 375 ml rou witrys
Metode
- Voorverhit die oond tot 180 °C.
- Verhit die olie en soteer die uie tot sag en deurskynend. Voeg die soetrissie by en soteer nog ’n bietjie. Roer die kerriepoeier en borrie by.
- Voeg die kookwater, blatjang, appelkooskonfyt, sout, peper en pietersielie saam en roer goed deur.
- Plaas die wors in ’n gesmeerde oondskottel met ’n deksel.
- Skep die uiemengsel bo-op die wors en versprei eweredig.
- Rangskik die perskeskywe bo-op en giet die kookwatermengsel bo-oor.
- Strooi die rys oor, sit die deksel op en bak vir 50 minute of tot die rys gaar is.
- Sit warm met slaai en broodrolletjies voor.
VARIASIE
Die perskes kan met pynappelstukkies vervang word.
Bron: Vinnig en Maklik: Resepte uit Vrouekeur 2 deur Marlo Carstens
Uitgewer: Lapa