Formule Een: Mercedes jaag hul vyfde titel in ʼn ry

Lewis Hamilton van Brittanje glimlag nadat hy pas die Mexikaanse Formule Een Grand Prix-kampioen geword het (28 Oktober 2018). Foto: AP Photo/Marco Ugarte

Die tweede laaste Formule Een Grand Prix van 2018 word Sondag in Brasilië gejaag. Die wedren word op die Jose Carlos Pace-baan in die distrik van Interlagos in Sao Paulo aangebied.

Twee weke gelede is die Mexikaanse Formule Een Grand afgehandel en Lewis Hamilton se vierde plek was genoeg om aan hom sy vyfde wêreldtitel te besorg. Die wedren is deur Max Verstappen (Red Bull) gewen met Sebastian Vettel (Ferrari) tweede en Kimi Räikkönen (Ferrari) derde.

Alhoewel die 2018-titel reeds gewen is, is daar steeds individuele prestasies wat belangrik is vir renjaers om hulself aan spanne te bewys en ook om voor te berei vir 2019. Die 33-jarige Hamilton het in 2008 sy eerste wêreldtitel juis in Brasilië verower. Tydens sy vorige 11 besoeke aan Brasilië kon Hamilton net een keer wen en twee keer eerste wegspring.

Op die jongste punteleer is Hamilton 64 punte voor Vettel.

1 Lewis Hamilton (Mercedes) 358

2 Sebastian Vettel (Ferrari) 294

3 Kimi Räikkönen (Ferrari) 236

4 Valtteri Bottas (Mercedes) 227

5 Max Verstappen (Red Bull) 216

6 Daniel Ricciardo (Red Bull) 149

In die vervaardigers-afdeling gaan Mercedes komende naweek poog om vir ʼn vyfde agtereenvolgende jaar die 2018-titel te wen. Op die punteleer is Mercedes 55 punte voor Ferrari. Die twee jaers van Red Bull, Daniel Ricciardo en Max Verstappen, kan ook vir hul span heelwat punte bymekaar maak.

1 Mercedes 585

2 Ferrari 530

3 Red Bull 362

4 Renault 114

5 Haas 84

6 McLaren 62

7 Racing Point Force India 47

8 Sauber 36

9 Toro Rosso 33

10 Williams 7

Die oefenrondes begin Vrydag en die kwalifisering word Saterdag afgehandel. Die hoofwedren word Sondag om 19:10 gejaag.

Die laaste wedren sal op 25 November in Abu Dhabi plaasvind.

Meer inligting is hier beskikbaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.