Die vierde Moto GP van die seisoen word Sondag in Spanje gejaag. Marc Marquez is die jaer met die momentum wat dopgehou moet word. Marquez het juis twee weke gelede die Grand Prix van die Amerikas vir die sede keer in ʼn ry op sy Repsol Honda gewen.
Sondag se wedren word in Jerez in Spanje gejaag. Die oefenrondes vir die Moto GP, Moto2 en Moto3 begin Vrydag om 09:00 en duur tot 16:00 die middag. Die kwalifisering vir die Moto GP se wegspringrooster sal Saterdag tussen 14:00 en 15:00 plaasvind.
Dani Pedrosa (Repsol Honda), wat sy gewrig sowat ʼn maand gelede gebreek het, behoort goeie rekenskap van homself te gee nadat sy seisoen aanvanklik stadig afgeskop het. Valentino Rossi (Yamaha), wat vierde in Amerika was, sal ook op die podium wil wees om sodoende sy posisie op die punteleer te verstewig. Hy is tans algeheel sewende.
Net vyf punte skei die voorste drie renjaers op die punteleer en vier jaers blaas behoorlik in die nek van die voorloper Andrea Dovizioso (Ducati).
Pos | Renjaer | Span | Punte |
1 | Andrea Dovizioso | Ducati | 46 |
2 | Marc Marquez | Repsol Honda | 45 |
3 | Maverick Vinales | Yamaha | 41 |
4 | Cal Crutchlow | LCR Honda | 38 |
5 | Johann Zarco | Tech 3 | 38 |
In Moto2 is Suid-Afrika se Brad Binder nou algeheel agtste en Steven Odendaal is 25ste. In Moto3 beklee Darryn Binder die 22ste plek op die punteleer.
Die wedrenne begin Sondag om 11:00 vir die Moto3-jaers, 12:20 vir die Moto2-afdeling terwyl die groot kanonne om 14:00 op die wegspringrooster sal aantree vir die Moto GP.
Klik gerus hier vir meer inligting.