Rafael Nadal is na amper vyf uur en vyf stelle se uitstekende tennis weer in die eindstryd van ʼn Grand Slam.
Hy het Grigor Dimitrov 6-3, 5-7 7-6, 6-7 en 6-4 in ʼn verbete stryd wat die skare vasgenael gehou het, geklop.
Nadal sal Sondag sy ou teenstander, Roger Federer in die eindstryd ontmoet – net soos in 2009 by die Australiese Ope. Nadal het toe die wedstryd in vyf stelle gewen.
Dimitrov het baie goed gespeel en sy kanse gehad; hy het twee breekpunte in die agste pot van die vyfde stel gehad maar Nadal het altyd van êrens af nog ʼn hou opgetower om te verhoed dat die Bulgaar deurgaan na sy eerste eindstryd in een van die Slams.
Dimitrov het drie wedstrydpunte afgeweer. maar uiteindelik was dit die Spanjaard wat met sy volgehoue veggees met die louere weggestap het.
Tennisliefhebbers kon nie vir ʼn beter eindstryd vir die Australiese Ope gevra het nie. Dit is asof ʼn goue era van tennis herleef.
♦ Nadal loop 23-11 voor in wedstryde teen Federer. Hy het nog net een keer die titel in Melbourne gewen en dit was in 2009 teen die Switserse meester.
Federer het laas in 2007 vir Nadal in ʼn Grand Slam-eindstryd, by Wimbledon, geklop. Nadal het in 2014 laas by die Franse Ope in ʼn eindstryd gespeel.
Federer het die Australiese Ope-titel al vier keer gewen, die laaste keer in 2010 in skoon stelle teen Andy Murray.