Roger Federer in Doha-aksie. Foto: Samer Al-Reijal/AFP.
Dit is voorlopig eers weer terug na die oefenbaan vir Roger Federer nadat hy sy wedstryd teen Nikoloz Basilashvili met 3-6, 6-1 en 7-5 in die Katar-ope verloor het.
Die 39-jarige speler het vroeër die week sy eerste wedstryd in 405 dae gespeel toe hy Brittanje se Daniel Evans geklop het. Sy besluit om nog ’n rukkie aan sy vaardighede te skaaf beteken dat hy die komende toernooi in Dubai sal misloop.
“Dit is wonderlik om weer in ’n toernooi te speel en ek het elke oomblik daarvan geniet. Ek het egter besluit dat dit wys sal wees om voorlopig weer na die oefenbaan terug te keer,” het Federer gesê.
Dit beteken dat hy waarskynlik volgende in Europa te siene sal wees, waar die kleibaanseisoen in April begin.
Hoewel hy self erken het dat hy nog nie op sy beste in Doha was nie, glo Evans – wat ook vooraf saam met Federer geoefen het – dat Federer steeds honger is om wedstryde te wen.
“Ja, hy was dalk nog effens verroes, maar hy het skielik sy aggressie-krane in die derde stel oopgedraai. Ek dink Roger het sy beste tennis in die laaste vier stelle van ons wedstryd gespeel,” het Evans gesê.
“Hy is 39 jaar oud en dit is ongehoord dat ’n manspeler op daardie ouderdom nog Grand Slams wil én kan wen. Sy storie is nog nie klaar nie en uit ’n ondersteuner se oogpunt sal dit lekker wees om te volg.”
It’s been great to be back on the @atptour , loved every minute playing in Doha once again. ????????
A big thank you to the best and loyal team that helped me get here. ????????
I’ve decided it’s best to go back to training and as a result, I’ve decided to withdraw from Dubai next week. ???????? pic.twitter.com/zp65Jt832n— Roger Federer (@rogerfederer) March 11, 2021
