Serena Williams sal ook nie deel van die Amerikaanse Ope-aksie in New York wees nie.
Die 39-jarige wenner van 23 Grand Slam-titels het op Instagram gesê dat sy nog nie voldoende van ’n dyspierbesering herstel het nie.
“Ek het ná deeglike oorweging en raad van my mediese span besluit om my aan die Amerikaanse Ope te onttrek om heeltemal van die besering te herstel. New York is een van my gunstelingplekke om te speel en ek sal ongetwyfeld die toeskouers mis,” het Williams geskryf.
Die Amerikaanse ster was Junie laas op die internasionale verhoog toe sy Wimbledon in trane verlaat het.
Williams was toe in aksie teen Aliaksandra Sasnovich in haar openingswedstryd. Sy het met 3-1 in die eerste stel voorgeloop voordat sy gegly en haar regterbeen beseer het.
Nadat sy mediese behandeling ontvang het, het sy nog vir ’n pot of twee voortgeveg, maar met die telling op 3-elk die handdoek ingegooi. Dit was die eerste keer in 20 Wimbledon-toernooie dat sy nie verder as die eerste ronde gevorder het nie.
Die Australiese Ope van 2017 was haar laaste Grand Slam-titel en sy sal nou tot 2022 moet wag om Margaret Court se rekord van 24 titels te ewenaar.
Ion Tiriac, ’n skatryk Roemeense sakeman en voormalige tennisspeler, het in Januarie haar ouderdom en gewig gekritiseer.
“Serena is ’n wonderlike speler, maar sy moes nou al haar uittrede aangekondig het as sy die ordentlikheid gehad het,” het die 81-jarige aan ’n Roemeense televisiestasie gesê.
Roger Federer (knie), Rafael Nadal (voet) en Dominic Thiem (gewrig) sal ook die Amerikaanse Ope met beserings misloop.
Serena Williams will miss the 2021 US Open due to injury.
Get well soon, @serenawilliams! ???? pic.twitter.com/ySXuuCRmPu
— US Open Tennis (@usopen) August 25, 2021
As jy oud word, word jy oud ….
Dalk was die ryk sakeman reg met sy kommentaar.