Die Amerikaanse Ope-tweestryd tussen Suid-Afrika se Kevin Anderson en Argentinië se Diego Schwartzman is vandag aanvanklik deur hewige reën gekniehalter.
Die tweede stel het skaars begin of toeskouers moes inderhaas na hul sambrele en reënjasse gryp; die Louis Armstrong-stadion se intrekbare dak kon nie verhoed dat ’n sterk wind die reën op die baan inblaas nie.
Soos wat oorsese joernaliste tereg sê: Dit het naderhand meer soos ’n vryslagitem as ’n tenniswedstryd begin lyk. Die Amerikaanse weerdiens het terselfdertyd ’n waarskuwing teen kitsvloede uitgereik.
Die kragmeting is na die Arthur Ashe-stadion verskuif waar Schwartzman uiteindelik met 7-6, 6-3 en 6-4 gewen het.
Die 35-jarige Anderson, wat in 2017 ’n finalis in New York was, het in die openingswedstryd 49 kishoue afgevuur. Hoewel hy vandag steeds 24 onbeantwoorde afslane afgestuur het, was Schwartzman opgewasse vir die taak.
Lloyd Harris moet later vandag teen Ernesto Escobedo speel nadat hy in die eerste ronde met Karen Kachanov afgereken het.
Update. Getting worse pic.twitter.com/ezVe9mSfep
— Darren Cahill (@darren_cahill) September 2, 2021