Vaughan Coveny, een van Nieu-Seeland se beste sokkerspelers nog, sê dat hy nie verstaan waarom die land se sokkerbeheerliggaam (NZF) dalk aan die nasionale span se All Whites-bynaam wil karring nie.
Maroela Media het vroeër berig dat die NZF dit oorweeg om die bynaam te skrap omdat dit dalk deur sommiges as nie inklusief genoeg bestempel word nie.
“Ek is iemand wat van tradisie hou; ek het jare vir die span gespeel en ek is verbaas dat hulle so iets wil doen. Eintlik gaan dit my verstand te bowe – gaan hulle dan ook die All Blacks se naam verander?” het Coveny in ’n onderhoud met die koerant Sydney Morning Herald gevra.
Die naamsverandering is nog nie ’n uitgemaakte saak nie, maar volgens Andrew Pragnell (NZF se uitvoerende hoof) is die beheerliggaam “op ’n reis van kulturele inklusiwiteit”.
“As deel van ons volhoubaarheidsprojek wat verlede jaar van stapel gestuur is, is ons besig om met belanghebbendes na alle dele van die organisasie te kyk om seker te maak dat dit voldoende is vir 2021 en daarna,” het Pragnell gesê.
Die naam verwys na die span se wit kleredrag wat hulle vir die eerste keer in kwalifiserende wedstryde vir die Wêreldbeker-toernooi in 1982 gedra het en Coveny meen dat dit deel van Nieu-Seeland se sokkergeskiedenis is.
“Die All Whites was nog altyd Nieu-Seeland se sokkerspan. Dit was deel van ons grootwordjare en jy het daarna opgekyk.”
Volgens Pragnell is dit nog te vroeg om oor die uitslag van die proses kommentaar te lewer, maar sokker streef daarna om die mees inklusiewe sportsoort in die land te wees.
Jason Pine, die bekende sportkommentator, het die beplande naamsverandering as “absolute malligheid” bestempel.
- Ander byname vir Nieu-Seeland se sportspanne: White Ferns (vrouekrieket), Black Caps (manskrieket), Black Sticks (hokkiespanne) en Tall Blacks (basketbalspan).
hahaha, gooi n paar meel bomme. Verkieslik “whole grain”.
Ai tog ……….. die All Blacks is OK, maar moet tog nie iets koppel aan die kleur WIT nie, dan is jy polities inkorrek.
Flouste flou ooit. Kan jy nou meer.
Ek wens die wêreld wil ophou met hul alewige polities korrektheid dit raak nou afgesaag en eentonig aan die een kant demokrasie en aan die ander kant politiese korrektheid.