Rafael Nadal en Novak Djokovic se halfeindstryd in die Wimbledon-tennistoernooi hervat Saterdagmiddag nadat dit Vrydagaand opgeskort is.
Nadal en Djokovic kon eers teen ongeveer 20:00 (BST) met hul wedstryd begin ná ʼn uitmergelende halfeind van ses uur en 36 minute tussen John Isner van Amerika en Kevin Anderson van Suid-Afrika. Anderson het uiteindelik 7-6(6), 6-7(5), 6-7(9), 6-4, 26-24 met Isner afgereken. Dit is die langste halfeind in die geskiedenis van Wimbledon.
Nadal en Djokovic kon slegs drie stelle binne die drie ure, voor die Wimbledon-bane vir die dag sluit, afhandel. Wimbledon het ʼn klokreël van 23:00 waar alle wedstryde wat steeds aan die gang is, opgeskort moet word.
Djokovic neem die voortou met 6-4, 3-6, 7-6 (11-9).
Die wedstryd hervat om 13:00 (BST) (14:00 Suid-Afrikaanse tyd), net ʼn uur voor die geskeduleerde tyd vir die vroue enkelspel-finaal tussen Serena Williams (Amerika) en Angelique Kerber (Duitsland).
Indien Nadal en Djokovic se wedstryd langer as ʼn uur sal duur, sal die vroue-finaal uitgestel moet word.
Die wenner van die wedstryd kom Sondag in die finaal teen Suid-Afrika se Kevin Anderson te staan.
Raven Klaasen (35), van King William’s Town in die Oos-Kaap, en sy dubbelspelmaat Michael Venus (30) van Nieu-Seeland, kom Saterdag ook teen die Amerikaners Mike Bryan (40) en Jack Sock (25) te staan. Dié wedstryd is tans geskeduleer vir 16:15 (Suid-Afrikaanse tyd).