Die 21-jarige Sydney McLaughlin het die eerste vrou geword om die 400 m-hekkies in minder as 52 sekondes te hardloop.
McLaughlin het Sondag tydens die Amerikaanse uitdunne vir die Olimpiese Spele ʼn rekordtyd van 51,9 sekondes aangeteken. Sy het sodoende Dalilah Muhammad se rekord van 52,16 sekondes wat tydens die 2019-Wêreldkampioenskap in Doha opgestel is, verbeter.
Muhammad moes Sondag met die tweede plek tevrede wees in ʼn tyd van 52,42 sekondes. Anna Cockrell het die derde kwalifiserende plek opgeraap in ʼn tyd van 53,7 sekondes.
Dit was nog ʼn klassieke tweestryd tussen McLaughlin en Muhammad, wat die afgelope vier seisoene die 400 m-hekkies oorheers.
Sondag se resies kon eers ná ʼn paar uur se vertraging plaasvind weens die rekord hittegolf wat Eugene, Oregon, tans ondervind.
Muhammad, wat vroeër die jaar eers ʼn blaaskans moes vat nadat sy Covid-19 opgedoen het, het ʼn effense voorsprong om die laaste draai gehad.
McLaughlin het egter in die pylvak behoorlik die krane oopgedraai om haar plek in die geskiedenisboeke te verseker.