Atletiekster oorwin Covid-19-hekkie

Wenda Nel. Foto: Reg Caldecott.

Die 400 m-hekkiespesialis Wenda Nel was Maandag vir die eerste keer in ’n lang ruk terug op die atletiekbaan nadat sy van Covid-19 herstel het.

“My hartkloptempo is nog ’n bietjie hoog; weliswaar nie super hoog nie, maar dit is beslis hoër as wat dit altyd was. Ek dink dit is die beste benadering om aanvanklik net rustig op die oefenbaan te wees,” het sy gesê.

“Ek was baie gelukkig dat ek nie van die ernstige Covid-19-simptome gehad het nie – ek het net ’n aanhoudende en knaende kopseer gehad. Ek kan egter steeds nie die feit ignoreer dat ek positief getoets is en dat ek die virus gehad het nie.”

Die hekkiester het gister haar 32ste verjaardag gevier en sy is nog glad nie van plan om haar spykerskoene finaal weg te bêre nie.

Foto: Reg Caldecott.

Sy het in 2010 haar eerste SA titel ingepalm, terwyl sewe verdere nasionale goue medaljes in die 400 m-hekkiesitem gevolg het. Van die ander hoogtepunte in haar loopbaan is haar persoonlike beste tyd van 54.37 s wat sy in 2015 in Beijing gehardloop het, terwyl sy ook ’n brons medalje by die Statebondspele ingepalm het.

“Mense vra my deesdae gereeld oor my toekomsplanne uit; ek dink hulle probeer uitvind of ek nog aan byeenkomste gaan deelneem. Die antwoord op daardie vrae is ’n doodeenvoudige ‘ja’. Die plan is om vir oulaas by die Olimpiese Spele in aksie te wees.

“Selfs al word die Spele weer eens afgelas, wil ek steeds hardloop. Ek wil nog daardie amperse perfekte wedloop hardloop.”

Maar maak nie saak wat oor die volgende 12 maande gebeur nie, Nel is meer as tevrede met haar loopbaan.

“Ek dink dat min atlete dit kan sê dat hulle amper alles vermag het wat hulle graag wou. Ek is ongelooflik bevoorreg om al in aksie by die Olimpiese Spele te gewees het, ek was in die finaal van die Wêreldkampioenskap en ek was op die podium by die Statebondspele.”