Suid-Afrika hét wêreldklas atlete

Caster Semenya het die Suid-Afrikaanse-rekord in die 1 000 m na 2:35:43 verbeter (8 Maart 2018). Foto: Roger Sedres/ImageSA/Gallo Images

Die algemene publiek besef nie aldag dat Suid-Afrika ʼn krag in wêreldatletiek is nie. Dit is Donderdagaand weer duidelik bewys tydens die tweede byeenkoms van die nuwe Grand Prix Atletiek-reeks in Pretoria. Ons Suid-Afrikaanse atlete het nie net die aand oorheers nie, maar ʼn paar atlete het uitstekende tye en afstande behaal.

Caster Semenya het die Suid-Afrikaanse-rekord in die 1 000 m na 2:35:43 verbeter.

Anaso Jobodwana het die wêreldkampioen, Justin Gatlin, in die 150 m geklop.

Ruswahl Samaai het in die verspring geslaag met ʼn sprong van 8,24 m en Akani Simbine het die 100 m in 10,05 gewen.

Semenya het die 1 000 m-rekord van Ilse de Kock Wicksell van 2:37.20, wat in 1983 opgestel is, na 2:35:43 verbeter. Semenya sal aanstaande week tydens vanjaar se Nasionale Kampioenskap fokus op die 800 m asook die 1 500 m.

Akani Simbine was vir die eerste keer die seisoen op die baan en het ʼn uitstekende tyd van 10,05 in die 100 m opgestel. Simbine het in die proses met Clarence Muyai en Simon Magakwe afgereken. Simbine sê hy sien uit na die SA-kampioenskap wat volgens hom ʼn goeie voorbereiding vir die Statebond Spele sal wees.

Anaso Jobodwana het die wêreldkampioen, Justin Gatlin, in die 150 m geklop (8 Maart 2018). Foto: Reg Caldecott/ANA

Anaso Jobodwana het op sy beurt met die 100 m-wêreldkampioen, Justin Gatlin, in die 150 m afgereken. Jobodwana se tyd was 15,08 sekondes. Dit was Gatlin se eerste 150 m-wedloop van sy lewe en hy kon net vierde eindig. Roscoe Engel was tweede en Luxolo Adams derde.

Ruswahl Samaai het in die verspring ʼn wenafstand van 8,24 m behaal. Samaai het sy oorheersing in die item duidelik gemaak deur vyf keer verder as 8 m te spring. Cheswill Johnson en Zarck Visser kon nie die 8 m-meter merk oorsteek nie.

Die ander item-wenners op die aand sluit in George Manangoi (800 m), Meike Strydom (gewigstoot), Isaac Makwala (300 m), Patrick Duvenhage (diskus), Joshua Cheptegei (3 000 m), Nicholas Bett (mans 400 m-hekkies), Jo-ane van Dyk (spiesgooi), Wenda Nel (400 m hekkies), Justine Palframan (200 m vroue), Marga Cumming (hamergooi) en Antonio Alkana (110 m-hekkies).

Die derde en laaste byeenkoms in die Grand Prix-reeks word op 22 Maart in die Paarl aangebied.