Die jaar is al byna drie maande oud en uiteindelik kan Formule Een-entoesiaste die oë en ore spits vir hul gunstelingsport se doen en late.
Kom ons noem egter dadelik dat daar agter die skerms hard geoefen, getoets en aangepas is om die motors pasgemaak te kry vir die 2018-seisoen. (Al het baie van die spanne maar min gesê of gedoen wat aan ander spanne hul geheime sou kon weggee).
Die nuwe eienaars van Formule Een, Liberty Media, het weggedoen met die mooi meisies op die wegspringrooster, maar goeie nuus is dat daar 360 grade-kameras op al die motors sal wees.
Die eerste wedren in vanjaar se Grand Prix-reeks word op Sondag 25 Maart in Melbourne gejaag en die laaste ronde sal eers op 25 November in Abu Dhabi afgehandel word. Daar is vanjaar 21 wedrenne in die seisoen. Elke motor sal beperk wees tot net drie masjiene vir die hele seisoen.
Lewis Hamilton (Mercedes) sal poog om reeds vroeg sy merk by die Australiese Grand Prix te maak wanneer hy met sy aanslag begin om vir ʼn vyfde keer die titel in te palm. Sy grootste teenstander behoort Sebastian Vettel in sy Ferrari te wees. Hamilton het reeds twee keer in Melbourne eerste oor die wenstreep gejaag (2008 en 2015). Sy nuwe kontrak met Mercedes sal hom sowat R650 miljoen ʼn jaar in die sak bring. Vettel het ook reeds twee keer koning gekraai in Australië.
Hamilton asook Vettel kan vanjaar hul vyfde wêreldtitels inpalm en daarmee die legendariese Juan Manuel Fangio ewenaar. Net Michael Schumacher spog met meer titels, naamlik sewe.
Valtteri Bottas sal sy sokkies moet optrek as spanmaat van Hamilton. Bottas het nie verlede jaar ʼn baie goeie jaar beleef nie, gegewe die dominansie van Hamilton in dieselfde motor. Niks sal egter die Mercedes-span meer genot verskaf as die eerste én tweede plekke in Melbourne nie.
Die plaaslike renjaer van Red Bull, Daniel Ricciardo, en die Nederlander Max Verstappen kan ook vanjaar hulle stemme dik maak.
Daar is vanjaar 10 spanne wat ingeskryf is.
MERCEDES
Lewis Hamilton
Valtteri Bottas
FERRARI
Sebastian Vettel
Kimi Raikkonen
RED BULL
Daniel Ricciardo
Max Verstappen
FORCE INDIA
Sergio Perez
Esteban Ocon
WILLIAMS
Lance Stroll
Sergey Sirotkin
RENAULT
Nico Hulkenberg
Carlos Sainz
TORO ROSSO
Pierre Gasly
Brendon Hartley
HAAS
Romain Grosjean
Kevin Magnussen
MCLAREN
Fernando Alonso
Stoffel Vandoorne
SAUBER
Marcus Ericsson
Charles Leclerc
Verlede jaar het die finale punteleer het só gelyk:
Pos | Renjaer | Span | Pte |
1 | Lewis Hamilton | Mercedes GP | 363 |
2 | Sebastian Vettel | Ferrari | 317 |
3 | Valtteri Bottas | Mercedes GP | 305 |
4 | Kimi Raikkonen | Ferrari | 205 |
5 | Daniel Ricciardo | Red Bull | 200 |
6 | Max Verstappen | Red Bull | 168 |
7 | Sergio Perez | Force India | 100 |
8 | Esteban Ocon | Force India | 87 |
9 | Carlos Sainz | Renault | 54 |
10 | Nico Hulkenberg | Renault | 43 |
11 | Felipe Massa | Williams | 43 |
12 | Lance Stroll | Williams | 40 |
13 | Romain Grosjean | Haas F1 | 28 |
14 | Kevin Magnussen | Haas F1 | 19 |
15 | Fernando Alonso | McLaren | 17 |
16 | Stoffel Vandoorne | McLaren | 13 |
17 | Jolyon Palmer | Renault | 8 |
18 | Pascal Wehrlein | Sauber-Ferrari | 5 |
19 | Daniil Kvyat | Scuderia Toro Rosso | 5 |
20 | Marcus Ericsson | Sauber-Ferrari | 0 |
21 | Pierre Gasly | Scuderia Toro Rosso | 0 |
22 | Antonio Giovinazzi | Haas F1 | 0 |
23 | Brendon Hartley | Scuderia Toro Rosso | 0 |
24 | Jenson Button | McLaren | 0 |
25 | Paul di Resta | Williams | 0 |
Vir meer inligting, besoek Formula1.com.
Schumi het sewe, nie agt nie. Die karre lyk ook almal soos vissie-plakkies hierdie jaar met daai ‘halo’ om die kajuit.
Julle het duidelik nie die eerste toetse gevolg nie. Red bull lyk baie sterker as Ferrari.