AB wys hy het steeds emmersvol klas

AB de Villiers (middel) met die wentrofee saam met Reeza Hendricks en Temba Bavuma. Foto: Twitter.

Die 3TeamCricket-inisiatief mag dalk volksvreemd vir die meeste krieketpuriste wees, maar op die einde is dit doodeenvoudig: Die span wat die meeste lopies aangeteken het, wen die wedstryd.

Op ’n dag toe die Black Lives Matters-inisiatief dalk die hoofopskrifte van nuusblaaie reg oor die land gehaal het, het AB de Villiers, Aiden Markram en Dwaine Pretorius se flitsende kolwe darem genoeg gedoen sodat uitgehongerde krieketliefhebbers ook iets gehad het om oor te glimlag.

De Villiers – wat by tye ’n Affies-masker gedra het – het die jare teruggedraai om 61 lopies van slegs 24 aflewerings te slaan.

Hoewel sy beurt nie foutloos was nie – Thando Ntini het byvoorbeeld ’n moeilike vangkans vanaf sy eie boulwerk verbrou – het hy gewys waarom hy steeds Suid-Afrika se gevaarlikste kolwer is. Veral daardie trekhou op die voorvoet van die blitsige Anrich Nortjé se boulwerk het mens laat terugdink aan sy briljante beurt vyf jaar gelede teen die Wes-Indiese Eilande op die Wanderers.

De Villiers het op daardie dag die vinnigste honderdtal in eendagkrieketgeskiedenis geslaan. En hoewel baie dinge in die wêreld sedertdien nie meer dieselfde is nie, het hy weer gewys dat hy enige tyd met iets spesiaals vorendag kan kom.

Of hy nog vir oulaas weer sal wil probeer om ’n groot trofee saam met die Proteas te wen, is egter ’n ope vraag.

Markram het 70 lopies van 33 balle geslaan, terwyl Pretorius net 17 aflewerings benodig het om ’n onoorwonne vyftigtal te moker.

Op die ou einde het De Villiers en Markram se Eagles 160 lopies in die toegelate 12 boulbeurte aangeteken, terwyl die Kites 138 en die Kingfishers 113 geslaan het.

En op ’n dag waar emosie, kapteins wat moes kopkrap om hul handjievol veldwerkers doeltreffend rond te skuif, ’n nuwe krieketkonsep en ’n wintervaal SuperSportpark die hoogty gevier het, was die uitslag uiteindelik heel eenvoudig om te bereken: Die span wat die meeste lopies geslaan het, het toe inderdaad gewen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

10 Kommentare

jongste oudste gewildste
Stanley

Hero to Zero!
Sy BLM steunery en knieg buigery het my alle respek vir hom laat verloor. Besef hulle nie wat hulle steun nie, BLM is ‘n sosiolistiese / komunistiese beweging.

Bittergal

Ek het alle respek vir die witvelle verloor wat die knie buig voor die swart afgod en dan nog met n gebalde vuis ook, die sogenaamde swartmag saluut. Dit het tyd geword dat ons hierdie kwotaspanne en hul borge boikot. Ek sal van nou af enige buitelandse span steun wat teen hierdie choker kwotaspan speel.

Kokkie

Sê ek ook, Stanley. Om nou nie eers van ou ‘has been’ Francois Pienaar te praat nie. Skande.

Johan

Alle respek verloor

Vrijburger

SA krieket ‘voort segt ek’. (Die oud Hollandse gesegde word in Afrikaans voetsek!)