Ierse kaptein slaan 100-tal teen Proteas

Andy Balbirnie. Foto: Mike Hewitt/AFP.

Die Protea-boulers het weliswaar goed in die afgelope reeks teen die Wes-Indiese Eilande gevaar, maar hulle het vandag effens die wind van voor in ’n koue Dublin teen Ierland gekry.

Die tuisspan het 290/5 in hul toegelate 50 boulbeurte aangeteken en veral hul kaptein – Andy Balbirnie – het amok onder die Protea-boulers gemaak.

Die Ierse kaptein het 102 lopies van 117 aflewerings geslaan en sy beurt het tien viere en twee sesse ingesluit. Hy is goed deur Harry Tector (79 van 68 balle) en George Dockrell (45 van 23 balle) bygestaan en hulle het 95 lopies van die laaste tien boulbeurte gemoker.

In Kagiso Rabada, Anrich Nortjé, Keshav Maharaj, Tabraiz Shamsi en Andile Phehlukwayo het Temba Bavuma net vyf boulers gehad om vanuit te kies. ’n Vreemde spankeuse want as een van daardie boulers sukkel, is daar niemand anders om uit te help nie.

Soos die noodlot dit wou hê, het Rabada (1/58) en Nortjé (0/64) vandag gesukkel, terwyl Phehlukwayo (2/73) oudergewoonte te veel lopies afgestaan het. Shamsi (1/42) en Maharaj (1/50) moes dus hul bes gedoen om die Iere in toom te hou.

Dan het die Proteas ook in die veld gesukkel: Aiden Markram en David Miller het vroeg in die wedstryd ’n paar vangskote verbrou.

Om 291 lopies vir ’n oorwinning aan te teken is g’n maklike taak nie – veral sonder Quinton de Kock wat ’n welverdiende blaaskans geniet.

Janneman Malan het egter goed begin en hy het spoedig twee grenshoue in sy beurt geslaan.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

9 Kommentare

jongste oudste gewildste
piet

Ek sien Australie het hul eerste drie T20-wedstryde teen die Windies verloor (en seker die reeks ook). Ons het hulle geklop.

Hendrik Marthinus

En Ngidi se nou wat?

Andre

SA Krieket buig darem die knie nou baie en ek dink nie dit is knie probleme nie !

Dirk Mostert

Genadiglik is elke bouler beperk tot net 10 beurte. Dan was daar die kapteinsbeurt van 10 lopies/20 balle.

Robert

Julle het pas 5 T20 wedstryde gespeel en nou skielik ‘n 50 boulbeurt wedstryd. Baie swak van die bestuur. Ek dog daar is ‘n T20 WB toernooi iewers in die jaar in die AE.