Dawid Malan. Foto: Twitter.
Dawid Malan ry tans op die kruin van die krieketgolf ná sy blitsige 103* van slegs 51 aflewerings in die laaste wedstryd van Engeland se T20-reeks teen Nieu-Seeland.
Die 32-jarige Middlesex-kolwer se beurt het nege viere en ses sesse ingesluit en is die vinnigste honderdtal vir Engeland in T20-krieket. Boonop is sy vennootskap van 182 lopies saam met Eoin Morgan die hoogste vennootskap om die vierde paaltjie in internasionale T20-krieket.
Sy avontuurlustige beurt het beteken dat hy omtrent ranglysspronge gemaak het en hy is tans die derde voorste kolwer in internasionale T20-krieket.
Malan is in Engeland gebore, maar het matriek aan Paarl Boys’ High in die Paarl behaal. Hy het sy eersterangse debuut vir die Boland in 2005/2006 gemaak. Sy pa, Dawid senior, het ook ’n paar wedstryde vir die Westelike Provinsie gespeel.
Kort daarna het hy egter vir Middlesex begin speel en hy het sy T20-debuut vir Engeland teen die Proteas in Cardiff gemaak.
Malan het terstond 78 lopies van 44 aflewerings teen die Suid-Afrikaners gemoker en is kort daarna vir die Britte se toetsspan gekies.
Hoewel hy ’n honderdtal teen Australië op die WACA-stadion geslaan het, sorg sy toetsloopbaan vir minder indrukwekkende leesstof as sy T20-syfers.
In nege mik-en-moker-wedstryde het hy 458 lopies teen ’n gemiddeld van 57 en ’n treftempo van 156.31 geslaan.
