Pakistan het vandag die laaste en beslissende T20-wedstryd teen die Proteas met vier paaltjies gewen om die reeks met 2 – 1 te beklink.
Die tuisspan het 16 lopies van die laaste twee boulbeurte benodig om met die louere weg te stap. Hulle het dit toe sommer van een bitter swak Andile Phehlukwayo-boulbeurt geslaan.
Die veelsydige speler van die Dolphins het omtrént in die wedstryd gesukkel. Hy is vir ’n nulletjie uitgehaal toe hy die bal reguit na min of meer die enigste veldwerker op die grens geslaan het, terwyl hy 37 lopies van sy 2,4 boulbeurte afgestaan het.
Ja, hy was nie die enigste Protea wat klei getrap het nie, maar goeiste; jy kan nie in die tweede laaste boulbeurt van ’n naelbytwedstryd bekostig om ’n foutbal af te stuur wat terstond vir ’n ses geslaan word nie.
Daarteenoor het David Miller en Tabraiz Shamsi skitterend gespeel.
Die linkshandige Miller het vóór die begin van die reeks gesê dat hy ’n mentor vir die onervare T20-groep wil wees. En dit is presies wat hy vandag gedoen het.
Die Protea-kolwers is weer eens dronk deur die tuisspan se draaiers gedraai en in ’n stadium was die telling 65/7.
Miller het egter met mening die langsteel ingelê en die bal is met reëlmaat oor die grens gejaag. Hy het uitstekend met die stertkantkolwers gekombineer om 85 onoorwonne lopies van 45 aflewerings te moker.
Sy beurt het toegesien dat die Suid-Afrikaners 164/8 in hul toegelate 20 boulbeurte aangeteken het en toe Shamsi (4/25) gesorg het dat Pakistan op 117/5 gesteier het, het ’n mens aan opskrite begin dink om die Proteas se reeksege te vier.
Maar dit was die spelers, afrigters, joernaliste en ondersteuners nie beskore nie.
Weereens knap gedaan manne. Daar is veggees geopenbaar soos lank laas gesien. Hier is beslis ‘n paar manne wie Mark Boucher met toe oe kan saamneem wereldbeker toe.
Net mense wat verloor roem op veg gees
As jy nie veg gees gesien het in die wedstryd nie, dan het jy dit nie gekyk nie. Daar is spelers wat vreeslik hard geveg het vir die span en dan was daar ander wat al hulle harde werk ongedaan gemaak het. Ek sal geen krediet vir die span gee nie, maar daar is wel individue wat krediet verdien
Lyk vir my na knoeiery.
Ek het self begin dink dat daar meer aangaan as net bloot swak spel. Kan nie dink dat een van die senior spelers so af dag het in al die fasette van sy spel nie
Solank daar rasse kwotas voorgeskryf word sal ons nooit ons beste spanne kan saamstel nie. Rasse kwotas lei tot middelmatigheid.