Nadat Anrich Nortjé verlede jaar as die beste nuweling aangewys is, het hy gisteraand tydens Krieket Suid-Afrika (KSA) se virtuele toekenningsplegtigheid met die gesogte speler van die jaar-toekenning weggestap.
Die Oos-Kapenaar het ook drie verdere toekennings – toetsspeler van die jaar, spelers se speler van die jaar en die ondersteuners se speler van die jaar – ontvang.
Nortjé was ongetwyfeld Suid-Afrika se beste bouler en hy het vyf paaltjies in ’n beurt teen Sri Lanka (6/56) en Pakistan (5/56) geneem. In sy tien toetse het hy 39 paaltjies teen ’n gemiddeld van 29,84 laat kantel.
Tydens die 2020-weergawe van die Indiese Premierliga het hy ook vir die vinnigste aflewering in die reeks se geskiedenis gesorg – ’n kartets van 156,22 km/h teen die Rajasthan Royals.
“Shoaib Akhtar se spoedrekord van 161,3 km/h is hopelik binne my bereik en is iets wat ek graag sal wil doen. Dalk, wanneer alles lekker saamspeel, is dit ’n prestasie wat ek in die toekoms kan vermag,” het hy destyds gesê.
George Linde, wat soveel veggees in die laaste toets teen Pakistan gewys het, is die nuweling van die jaar.
Onder die Protea-vrouespelers is Shabnim Ismail, ook ’n snelbouler, as die speler van die jaar aangewys.
Die 32-jarige Ismail het saam met Lizelle Lee ’n deurslaggewende rol in die Proteas se spogvertonings teen Pakistan en Indië gespeel en sy is ook die T20-speler van die jaar.
Wenners:
Speler van die jaar:
Anrich Nortjé en Shabnim Ismail
Toetsspeler van die jaar:
Anrich Nortjé
Eendagspeler van die jaar:
Rassie van der Dussen en Lizelle Lee
T20-speler van die jaar:
Tabraiz Shamsi en Shabnim Ismail
Spelers se speler van die jaar:
Anrich Nortjé, Aiden Markram en Shabnim Ismail
Ondersteuners se speler van die jaar:
Anrich Nortjé
KFC se Streetwise-toekenning:
Lizelle Lee vir haar onoorwonne beurt van 132 teen Indië
Aflewering van die jaar:
Wiaan Mulder toe hy vir Kusal Mendis uitgeknikker het.
Nuweling van die jaar:
George Linde
Plaaslike speler van die jaar (vierdagkrieket):
Aiden Markram
Plaaslike speler van die jaar (eendagkrieket):
Robbie Frylinck
Plaaslike speler van die jaar (T20-krieket):
Sisanda Magala