Protea-boulers kry pak slae in Pakistan

Foto: Twitter.

Pakistan moes in die afgelope toetsreeks teen Nieu-Seeland bontstaan. Neil Wagner en kie het hul kolwers gepeper, terwyl Kane Williamson die een honderdtal ná die ander gemoker het.

In die huidige toets teen die Proteas in Karatsji was hul telling in ’n stadium 27/4 en selfs die Suid-Afrikaners se beskeie eerstebeurttelling van 220 het ligjare weg gelyk.

Druk nou die versnelknoppie na die derde dag van die wedstryd en die tuisspan het skielik ’n reusevoorsprong van 158 lopies.

Danksy skitterbeurte deur Fawad Alam (109), Faheem Ashraf (64) en Azhar Ali (51) het die Pakistani’s se terugvegpoging vir niks geskrik nie.

Voeg daarby ’n vennootskap van 55 lopies om die tiende paaltjie tussen Yasir Shah en Nauman Ali; en Quinton de Kock moes toekyk hoe sy span 378 lopies in die veld afstaan.

Op die boulfront het Kagiso Rabada (3/70) sy 200ste toetspaaltjie vir Suid-Afrika geneem toe hy Hasan Ali skoongeboul het. Hy het die mylpaal in sy 43ste toets vir die Proteas behaal.

Anrich Nortjé (2/105) het egter te veel lopies afgestaan, terwyl Lungi Ngidi (2/57) se boulsyfers weliswaar beter gelyk het, maar die tuisspan se kolwers het sy aflewerings met die grootste gemak gespeel.

Aiden Markram het die eerste aflewering van die Protea-beurt vir ’n vier na die grens gestuur. Maar om dinge in perspektief te plaas: hy sal 40 soortgelyke houe moet speel net sodat Pakistan weer sal moet kolf.

Die Proteas het al vantevore ’n toets in ’n soortgelyke posisie gewen óf ’n gelykop uitslag afgedwing. Maar dit was in die dae van Fanie de Villiers, Jonty Rhodes, Neil McKenzie en Graeme Smith.