Temba Bavuma en sy Protea-span benodig 321 lopies om die eendagreeks teen Pakistan te beklink.
Die besoekers het so pas ’n mededingende telling van 320/7 in hul toegelate 50 boulbeurte opgestapel – grootliks te danke aan Fakhar Zaman (al weer), Babar Azam en ’n blitsbeurt deur Hasan Ali.
Maar soos wat Bavuma vanoggend opgemerk het: Dit is moeilik om ’n telling op SuperSportpark te verdedig, maar terselfdertyd gaan dit g’n maklike taak wees om die lopies te kry nie.
Sonder Quinton de Kock, Rassie van der Dussen en David Miller het die Proteas ’n baie onervare kolflys; net Aiden Markram het al meer as 25 eendagwedstryde vir die Suid-Afrikaners gespeel.
Tog bied dit die perfekte geleentheid vir spelers soos Janneman Malan en Kyle Verreynne om hul permanente kleim in die span af te steek.
Malan het juis verlede jaar ’n skitterende onoorwonne honderdtal teen die Australiërs aangeteken en die Suid-Afrikaners sal hoop dat een van hul toporde-kolwers weer ’n soortgelyke beurt sal speel.
Vroeër het Keshava Maharaj (3/45) goed geboul om onder meer van Zaman (101) en Mohammad Rizwan (2) ontslae te raak. Bavuma het slim met sy draaiers te werk gegaan en Markram (2/48) het selfs die boulwerk geopen.
Babar Azam (94) en Hasan Ali (32) het egter laat in die beurt die lang steel ingelê om toe te sien dat die besoekers meer as 300 lopies aanteken.
Andile Phehlukwayo – wat so byna drie lopies in die laaste boulbeurt van die vorige kragmeting verdedig het – het egter swaar geleef vandag en die Pakistani’s het 37 lopies van sy vier boulbeurte gemoker.
En kan dit nie kry nie