Die Nieu-Seelandse en Australiese T20-krieketspanne het vandag altesaam 434 lopies in 40 aksiebelaaide boulbeurte in Dunedin gemoker.
Die tuisspan het weliswaar die kragmeting met vier lopies gewen, maar daar was ’n paar benoude oomblikke – veral toe Marcus Stoinis en Daniel Sams die langsteel ingelê het.
Nieu-Seeland het vir die besoekers ’n reuseteiken van 220 vir ’n oorwinning opgestel; grotendeels te danke aan Martin Guptil (97 van 50 balle) en Jimmy Neesham (45 van 16 balle) se warrelwindbeurte.
Die Suid-Afrikaans gebore Devon Conway – wat in die eerste wedstryd 99 onoorwonne lopies geslaan het – is hierdie keer vir net twee lopies uitgehaal.
Daarna het die tuisspan se boulers amok in die eerste 13 beurte van Australië se kolfpoging gemaak. Mitch Santner (4/31) en Tim Southee (1/47) het gesorg dat die besoekers op 113/6 gesteier het, maar toe kom Stoinis en Sams bymekaar.
Die twee het ’n uitstekende vennootskap van 92 lopies gedeel en die Kiwi’s het elke nou en dan benoud na die telbord geloer.
HULK! It clears the rope and lands over the crowd – nine needed off two #NZvAUS
— cricket.com.au (@cricketcomau) February 25, 2021
Vyftien lopies was van die laaste ses aflewerings benodig, maar Sams (41 van 15 balle) is met die eerste aflewering van Neesham se beurt terug na die kleedkamer gestuur, terwyl Stoinis (78 van 37 balle) kort daarna gevolg het.
Nieu-Seeland het die eerste wedstryd van die reeks met 53 lopies gewen.
WHAT A GAME OF CRICKET. @JimmyNeesh with 2 wickets in the 20th over to defend the total and maintain the team's unbeaten record at University of Otago Oval. Serious striking from Marcus Stoinis for Australia. #NZvAUS pic.twitter.com/L357Cw9t53
— BLACKCAPS (@BLACKCAPS) February 25, 2021