Uiteindelik, Proteas wen weer!

Tog het die Proteas gesukkel om die telling te jaag en dit het hulle byna 29 boulbeurte geneem om die wenlopies aan te teken. Foto ter illustrasie. (Foto: Cricinfo.)

Die Proteas het gister hul eerste oorwinning in die Wêreldbeker-kriekettoernooi gesmaak toe hulle Afganistan met nege paaltjies in Cardiff getroef het.

In vorige Wêreldbeker-toernooie sou ’n Protea-sege teen Afganistan vanselfsprekend gewees het, maar ná vanjaar se rampspoedige begin in die toernooi het almal ’n groot sug van verligting geslaak.

“Ek is ’n baie verligte man,“ het Faf du Plessis by die perskonferensie beaam.

“Ons het vooraf baie oor ons energie op die veld gepraat en ek dink ʼn mens kon vandag ’n verskil op die veld gesien het.”

Du Plessis het weer eens die loot gewen en besluit om Afganistan in te stuur om te kolf.

Met die telling op 62/2 het spoke van die Bangladesj-fiasko – waar Du Plessis se besluit om ook eerste te boul lelik skeefgeloop het – in die Protea-huis begin rondloop.

Maar ’n reënonderbreking, tesame met die briljante Imran Tahir, het die Suid-Afrikaners weer op die voorvoet geplaas.

Die 40-jarige Tahir is tans sy gewig in goud werd en het op ’n blad wat nie veel hulp aan draaiers verleen nie, 4/29 geneem.

Chris Morris (3/13) en Andile Phehlukwayo (2/18) het gewys dat die Protea-boulers paaltjies sonder Dale Steyn en Lungi Ngidi kan neem en Afganistan is almal vir 125 uitgeboender.

Kagiso Rabada het ’n stil dag gehad. Hopelik spaar hy die petrol in sy tenk vir Nieu-Seeland en Australië.

Tog het die Proteas gesukkel om die telling te jaag en dit het hulle byna 29 boulbeurte geneem om die wenlopies aan te teken.

Quinton de Kock (68 van 72 balle) het goed gelyk, maar Hashim Amla se onoorwonne 41 het hy van 83 balle geslaan. Hy het sy lopies teen ’n treftempo van 49 geslaan – ’n skilpadtempo in toetskrieket, om nie eens van witbalkrieket te praat nie.

Tog is Du Plessis nie te veel hieroor gepla nie.

“Ons moet die groter prentjie met Hashim raaksien. Hy is ’n baie belangrike skakel in ons span en die tyd wat hy in die middel spandeer is goud werd.”

Die Proteas is nou sewende op die punteleer, bó Pakistan, Bangladesj en Afganistan. Dié drie spanne het egter almal een minder wedstryd gespeel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

19 Kommentare

jongste oudste gewildste
Schalk

Asof dit nou n reuse prestasie is teen n swak krieket land soos Afganistan. SA het nou al oor en oor bewys dat hulle nie op hierdie vlak kan meeding nie. Om met n spul beseerdes en ‘hasbeens” na n wereldbeker te gaan is n duidelike bewys van hoe onbekwaam die keurders is.

jean

Dit is nou soos om kafee toe te gaan en niks te koop nie

Matt

Hashim se tyd is al lankal verby. Hy het seker gedink dat as hy ‘n enkel lopie in elk van die 48 boulbeurte aanteken sal dit wys hy is ‘n kolwer om op staat te maak….. en van Faf om hom dan nog op ‘n troon te plaas as “goud werd”, laat mens regtig wonder! Die span sal baie moet doen, en ek praat nie van net-net wenne in die volgende wedstryde nie, om te wys dat hul ons ondersteuning werd is.

LV

Mens sou dink dit was n eindstryd soos Tahir te kere gegaan het!

Duppie

Haai rerig, het hulle gewen. Wat ‘n besonderse prestasie vir hulle. Ek dink enige goeie skool span sou hulle ook gewen het. Dit is dam vreeslik as jy niks meer beteken nie, dis seker hoekom hulle so bly was om te wen. As dit ook nie vir die reën was nie, dan was hulle sker nog laer op die punte leer.