Luister: Vandag se sportnuus

Cheslin Kolbe. (AP Photo/Mark Baker)

Rugby:

• Daar is goeie nuus vir Suid-Afrikaanse rugby-ondersteuners vanoggend: Cheslin Kolbe is beskikbaar vir Saterdag se Wêreldbeker-eindstryd in Japan.
• Kolbe het vroeër sy enkel beseer en het die halfeindstryd teen Wallis misgeloop. Hy is deur S’bu Nkosi in die beginspan vervang.
• Rassie Erasmus, Bok-afrigter, het tydens vandag se perskonferensie bevestig dat hy sy span uit ’n volsterkte groep van 31 spelers kan kies.
• Die Springbokspan sal Donderdag aangekondig word.
• Intussen sal Kaapstad die Wêreldbeker-sewestoernooi in 2022 aanbied. Jurie Roux, SA Rugby se uitvoerende hoof, het dié nuus bevestig.
• “Ons was al vir ’n hele rukkie gretig gewees om internasionale rugbytoernooie aan te bied, en om gasheer te speel vir die sewes-vlagskiptoernooi is baie opwindend,” het hy gesê.

Krieket:

• Die Mzansi Superliga is om die draai en voormalige Proteas soos JP Duminy en Dale Steyn is opgewonde oor wat die toernooi vir Suid-Afrikaanse krieket kan beteken.
• “Dit beteken ongelooflik baie vir plaaslike krieket in Suid-Afrika. As jy na ons krieket so twee, drie jaar gelede gekyk het, was eersterangse krieket beslis op die afdraande pad. Nou kan plaaslike talent met internasionale spelers skouers skuur; en dit help sonder enige twyfel,” het Duminy gesê.
• Op sy beurt voel Steyn dat die Mzansi-reeks vir plaaslike spelers ’n platform skep om hul drome te bewaarheid.
• “Verlede jaar het niemand juis geweet wie Rassie van der Dussen is nie. Maar hy was die speler van die reeks in die 2018-weergawe van die Mzansi Superliga en hy is tans besig om hard aan die deur van die Suid-Afrikaanse toetsspan te klop,” het Steyn gesê.