Olimpiese Spele: Murray kan medalje in driekamp wen

Met net vier dae oor voordat die Olimpiese Spele Sondag ten einde loop, het Suid-Afrika nog net drie werklike aanspraakmakers op medaljes oor.

Woensdag het die drome van die kanovaarder, Bridgitte Hartley (500 m-snelroei), en die atlete, Rocco van Rooyen (spiesgooi) en Willem Coertzen (tienkamp), geëindig.

Caster Semenya het Woensdag die tweede uitdunronde van die 800 m vir vroue in 1:59.31 gewen en bly een van die groot gunstelinge. Sy neem vroeg Vrydagoggend (SA tyd) aan die halfeindronde deel en kan haar plek in die eindstryd bespreek. In die spiesgooi vir vroue kan Sunette Viljoen ook vroeg  Vrydagoggend in die eindronde haar stempel afdruk.

Daar  is groot verwagtinge van Richard Murray en Henri Schoeman in die driekamp. Murray, die huidige Wêreldbekerkampioen, het ʼn paar weke gelede geval en sy sleutelbeen gebreek, maar dit lyk of die ruskans hom goed gedoen het. As hy by die voorlopers in die 1 500 m-swem kan hou, kan hy in die fietsry (43 km) en hardloop (10 km) die ander 54 atlete uitstof. Schoeman se broer, Riaan, het in 2010 in Delhi ʼn bronsmedalje in swem op die Statebondspele gewen en is sy oefenmaat.

Die vroue-gholfspelers, Ashleigh Simon (75) en Paula Reto (74), slaan Donderdag in die tweede ronde van die vroue-gholftoernooi af en sal sukkel om die voorlopers, Ariya Jutanugarn van Thailand (65) en die twee Koreane Inbee Park en Kim Sei-young (albei 66), in te haal.

Hou gerus die driekampers dop, hulle is atlete van staal en medaljepotensiaal.

Suid-Afrikaners Donderdag in aksie:

Atletiek: 02:31 (Vrydag): 800 m vir vroue: Halfeindronde: Caster Semenya

02:10 (Vrydag): Spiesgooi vir vroue: Eindronde: Sunette Viljoen (moontlik)

Driekamp: 16:00: Richard Murray en Henri Schoeman

BMX:18:30: Kwarteindronde: Kyle Dodd

Gholf: 12:52: Tweede ronde van vroue-gholftoernooi: Ashleigh Simon en Paula Reto

Kanovaart:15:04:  B-eindronde van 500 m: Bridgitte Hartley