Die Springbokflank Willem Alberts kon Donderdag nie sy fiksheidstoets slaag nie en word in die Springbokgroep na Australasië deur die Goue Leeus se kaptein en agsteman, Warren Whiteley, vervang.
Alberts, wat albei die naelskraap-wentoetse teen Argentinië weens `n dyspierbesering misgeloop het, het effense senuwee-irritasie in sy lae rug tydens Donderdag se fiksheidstoets ondervind. Hy is vir skandering gestuur.
“Verdere ondersoek na die simptome is nodig en Willem sal `n aantal spesialiste moet sien om die optimale herstelplan te bepaal sodat ons hom so spoedig moontlik weer op die veld kan kry,” het die Springbokke se spandokter, Craig Roberts, Donderdag gesê. Alberts se dyspier herstel wel goed.
Whiteley sal hom Vrydagoggend by die span aansluit. Die Springbokke, wat die laaste paar dae afgegee is, vertrek Saterdag na Australië.
Juan Smith vra meer tyd
Die Bok-afrigter, Heyneke Meyer, sê hoewel die Toulonflank Juan Smith op gereedheidsgrondslag as plaasvervanger was, het Smith gevra dat hy meer tyd gegun word om aan sy wedstrydfiksheid te werk.
“Hy stel hoë standaarde aan homself en was nie tevrede met sy vertoning in Salta nie,” het Meyer gesê.
Hy het bygevoeg dat Whiteley `n natuurlike agsteman is en dat dit dié posisie is waarvoor hulle ekstra dekking nodig het.
Die Springbokke sal Vrydag in Johannesburg oefen en Saterdag na Perth vertrek, waar hulle aanstaande Saterdag (12:05 SA tyd) teen Australië speel. Die daaropvolgende Saterdag speel hulle in Wellington teen Nieu-Seeland (09:35).