Allister bly aan as afrigter (episode 16)

Allister Coetzee. Foto: Saru

Allister Coetzee. Foto: Saru

Sjoe, en daar staan dit toe Donderdagoggend swart op wit op die voorblaaie van die koerante en op webwerwe: Allister Coetzee sal vir eers as Springbokafrigter aanbly vanweë die vrese vir die minister van sport, Fikile Mbalula.

En natuurlik ook omdat die Suid-Afrikaanse Rugbyunie nie genoeg geld het (glo R13 miljoen) om Coetzee van sy kontrak te onthef en ʼn nuwe afrigtingspan aan te stel nie.

Dis nog nie amptelik nie en Saru sal die aankondiging glo doen “wanneer die prosesse afgehandel is”.

Maar wanneer is dit?

Gaan kyk maar wat Pale Toe op 12 Desember berig het nadat die uitvoerende bestuur vergader het: “Sy opvolger se naam verander weekliks. Dan is dit Rassie Erasmus voor in die ry, dan word die Nieu-Seelander Dave Rennie gejag. Dan word Johan Ackermann se naam genoem, dan moet Brendan Venter die Bokke reg dokter. Sal dit gebeur? Nee, Coetzee sal aanbly, al bespiegel wie wat ook al.”

Dit was toe al duidelik: die rugbybase sal na die pype van Mbalula dans, want as hy nie sy steun gee vir Saru se Wêreldbekerbod nie, sal die son nie môre skyn nie.

As Mbalula tevrede is met die vordering wat rugby (en atletiek, krieket en netbal) die afgelope jaar getoon het, sal hy sy steun aan hulle gee en dan kan hulle weer wêreldbyeenkomste aanbied.

Maar verdien Suid-Afrika dit om weer ʼn Wêreldbekertoernooi aan te bied? Watter nalatenskap sal daar wees? Hoeveel nuwe stadions sal in Suid-Afrika gebou moet word?

Nie een nie, want Ellispark, die FNB-stadion neffens Soweto, Loftus Versfeld, Nuweland en die Kaapstadse stadion, die Vrystaat-stadion, Kingspark en die Moses Mabhida-stadion in Durban, die Mbombela-stadion, Nelson Mandelabaai-stadion en die twee stadions in Polokwane is reeds meer as voldoende.

Maar in Ierland (hulle is saam met Suid-Afrika en Frankryk in die wedloop) is daar ʼn dringende behoefte om van die stadions op te gradeer, om ʼn nalatenskap te laat en om toerisme ʼn hupstoot te gee, om rugby te bevorder en om die land se rugbybase en hul regering ʼn kloppie op die skouer te gee.

Maar in Suid-Afrika?

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Johan

Ek sal maar van nou af tennis kyk want die rugby ????????

SkarrelKind

Is daar dan nog mense wat Springbokrugby kyk in SA?!

m

Vandat kleur alles regeer kyk ek lankal nie meer enige sport nie.

a

O my genade dit is die grootste ramp nog!!!!

Frans C

Hoe gouer die naam Springbok vervang word met ‘n naam om by die span te pas, hoe beter.