Am bly eers Hoofhaai, al is Kolisi in Durban

Dr. Eduard Coetzee en Siya Kolisi. Foto: Twitter.

Die Springbok-kaptein Siya Kolisi sal vir eers nie die leisels by die Haaie vasvat nie.

Die 29-jarige – wat in 2019 saam met sy Springbokspan die Webb Ellis-trofee in Japan omhoog gehou het – sal voortaan sy provinsiale rugby saam met die KwaZulu-Natalse span in Durban speel.

Maar Lukhanyo Am sal egter steeds die span op die veld aanvoer. Dr. Eduard Coetzee, die Haaie se uitvoerende hoof, het die nuus bevestig.

“Die rede hiervoor is omdat ons ’n omgewing vir Siya wil skep waarin hy kan floreer. Lukhanyo doen tans uitstekende werk en ons wil vir eers nie ekstra druk op Siya se skouers plaas nie,” het Coetzee gesê.

Kolisi en die Westelike Provinsie se rugbypaadjies het vroeër vandeesweek ná meer as tien jaar geskei en hy het ’n kontrak met die Haaie onderteken.

“Dit is ’n ongelooflike dag vir Haai-rugby. Hy maak ’n regmerkie langs elke boksie waarvoor ons rugby staan. Hy is ’n wonderlike mens, die beste kaptein – iets wat hy bewys het toe hy ons land na Wêreldbeker-glorie gelei het – en ’n uitstekende speler.”

Op sy beurt is Kolisi tevrede met die feit dat hy nie die kaptein van die span is nie.

“Ek word nie soggens wakker en dink ek wil kaptein wees nie; inteendeel, ek is net mal daaroor om rugby te speel. Dit is die heel belangrikste vir my en daarom wil ek ’n Springbok wees,” het Kolisi gesê.

Siya Kolisi word deur sy spanmaats gelukgewens na sy drie teen die Hane op Kingspark in Durban op 17 Junie 2017. Foto: GB Jordaan

Hy het bygevoeg dat hy sy beste vir sy nuwe span sal gee, maar hy was eerlik om te erken dat sy spelpeil oor die afgelope ruk nie na wense was nie.

“Ek glo dat ek een van daardie spelers is wat vyf wedstryde agtereenvolgens moet speel, veral in die begin van die seisoen.”

Beserings en die wêreldwye Covid-19-pandemie het egter ’n stokkie daarvoor gesteek.

“Ek weet dat ek hard moet werk en vir my plek in die span moet veg. Niks gaan op ’n silwer skinkbord vir my gegee word nie. Ek moet ’n goeie voorseisoen hê en wanneer ek gereed is, sal ek ’n kans kry om te speel.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
MakersMark

Oor drie jaar is die sharks se rugby teen die planke soos die province nou is.

Michael

Kolisi het beslis nie die span na wereldbeker gelei nie-die meerderheid van ons weet en kon sien op die veld wie die eintlike kaptein was. Hy is uit en uit ‘n politieke keuse. Dit was briljant van Rassie om hom kaptein te maak en so die kommunistiese regime van sy rug af te kry-hulle het boots en all daarvoor geval. Rassie sal dit egter nooit in die openbaar erken nie en Kolisi weet dit ook