Berry verkwalik Rassie vir skade aan reputasie

Die Australiese skeidsregter, Nic Berry. Foto: Andrew Samson/AFP.

Nic Berry, die Australiese skeidsregter wat die hoofrol in Rassie Erasmus se video vertolk, sê dat sy reputasie onder die striemende aanval skade gely het.

“Die openbare aanval op my integriteit en karakter is iets wat in geen werksplek geduld sal word nie,” het Berry gesê.

Volgens die 37-jarige skeidsregter, wat in sy speeldae vir die Queensland Reds en die London Wasps uitgedraf het, het sy gesin ook deurgeloop.

“Ons het net slegte herinneringe van die hele ervaring. Ek het jare lank probeer om my reputasie as internasionale skeidsregter op te bou en die aanlyn video het binne ’n oogwink onmeetbare skade aangerig.

“Ek voel my reputasie as skeidsregter en persoon is vir ewig aangetas, ongeag die uitslag van enige moontlike optrede.”

Rassie Erasmus. Foto: GB Jordaan.

Erasmus het ’n video van langer as ’n uur oor Berry se kleitrappery in die eerste toets tussen die Springbokke en die Britse en Ierse Leeus in Kaapstad gemaak. Hy het onder meer 26 skeidsregterfoute uitgewys, terwyl hy ook voorbeelde uitgelig het waar daar nie genoegsame respek aan die Bokke, en veral nie aan Siya Kolisi, betoon is nie.

Berry meen dat die gewraakte video sy professionaliteit bevraagteken, terwyl dit ook daarop sinspeel dat hy nie regverdig is nie.

“Sy [Erasmus se] optrede druis in teen alles waarvoor rugby staan en dit is belangrik dat ek teen sulke gedrag ’n standpunt moet inneem.”

Wêreldrugby se tugkomitee was ook beïndruk met Berry toe hulle na sy weergawe van die gebeure geluister het.

“Hy het geen motief gehad om te jok, dinge te oordryf of om te mislei nie. Hy het ons met sy stille waardigheid, nederigheid en selfbeheersing tydens sy getuienis beïndruk.”

Tog stem nie almal met Berry saam nie.

Ian McIntosh meen dat Erasmus vir sy video geprys moet word; skeidsregters is immers nie verhewe bo kritiek nie.

“Kan iemand Wêreldrugby met die nodige respek inlig dat wette daargestel is om die spel te laat vloei, en nie om dit gereeld te onderbreek nie? Terselfdertyd is dit ook belangrik dat die skeidsregter weer no. 31 op die veld word en nie no. 1 nie,” het McIntosh destyds in ’n onderhoud met iol.co.za gesê.

Die oudafrigter meen dat skeidsregters daarop uit is om strafskoppe uit te wys, in plaas daarvan om die spel te laat vloei.

“Hoe anders word die 30 strafskoppe per wedstryd verduidelik? Die ou beginsel van om op die spel te konsentreer en nie die wet nie, het duidelik by die stadionvenster uitgewaai.”

Uiteindelik hou niemand daarvan as hul foute uitgewys word nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

25 Kommentare

jongste oudste gewildste
Manie

Die enigste reputasie wat jy wel oor die jare opgebou het, is die van ‘n swak skeidsregter Mnr Berry. Tatta “Sheila”.

anniekiewiet

Ek ken min van rugby, maar is daar enige foute/verdraaiing in Rassie se video wat tog uit die wedstrydvideo kom? Ek vra maar net.

Danie

Nee wat ou seun. As jy nie so pateties geblaas het nie, sou daar nie soveel kritiek teen jou gewees het nie. Skeidsregters maak foute, ons weet dit, hulle is ook net mens en ons aanvaar dit so MAAR jy was pateties op n heel ander vlak gewees. Moenie nou kom vertel dat jy voel dit was nie reg nie, gaan oorweeg liewer n ander loopbaan.

PP

Nic Berry jou reputasie sou nie in gedrang gekom het as jy integriteit gehad het nie. So moet nou nie daaroor kerm nie.
Daar is mijoene kykers daar buite wat ook die wedstryd regverdig geblaas wil sien, en jy was swak blaser.

VaalDonkie

Wel as jy nie so opgetree het nie, sou die video jou nie laat sleg lyk het nie