Bokke druk nege drieë teen hul bure

: RG Snyman op die oorlogspad vir Suid-Afrika teen Namibië. Die Springbokke het dié Wêreldbeker-kragmeting 57 – 3 gewen. (Foto: Springbokke Twitter)

Kyk, die doel van rugby is eintlik eenvoudig: Jy moet net meer punte as jou teenstanders aanteken om die wedstryd te wen. En dit is presies wat die Springbokke vandag gedoen het toe hulle Namibië 57–3 in hul Wêreldbeker-wedstryd in Japan ore aangesit het.

Ja, die Bokke het nege drieë gedruk en hul verdediging het gesorg dat die Namibiërs se enigste punte te danke aan ’n strafskop was, maar dinge – veral hul afrondingswerk – kon beter gewees het. Baie beter om eerlik te wees.

Met verskeie hardebaarde wat teen die All Blacks diens gedoen het op die plaasvervangersbank, het spelers soos Kwagga Smith, RG Snyman en Herschel Jantjies kans gekry om hul staal in die beginspan te wys, terwyl die 38-jarige Schalk Brits die span vanaf agtsteman aangevoer het.

Wenkbroue is dalk gelig oor Brits se posisionele skuif van haker na die nommeragttrui, maar dit was eintlik verbasend lekker om daardie rooi skrumpet agter die skrum te sien rondbons.

Vooraf het almal geweet die Bokke gaan wen, die vraag was net hoe ver. Die vorige twee kere dat dié spanne kragte teen mekaar gemeet het, het die Suid-Afrikaners onderskeidelik 105 punte en 87 punte opgestapel.

Vandag het vyf drieë in die eerste helfte – die rolmaalbeweging is dalk té gereeld uit die driedrukspens gehaal, tog het Lukhanyo Am se drie net vóór rustyd die nodige kykplesier verskaf  –  gesorg dat hulle ’n gemaklike rustydvoorsprong van 31–3 geniet het.

Die gevaarlike S’bu Nkosi het hopeloos te min geleenthede op die aanval gekry. (Foto: Twitter)

In die tweede helfte het dinge egter begin ontrafel met die Bokke wat net nie kon afrond nie. Die bal is hopeloos te veel kere aangeslaan en hoewel die humiditeitsfaktor gesorg het dat dinge glibberig geraak het, verwag ’n mens van internasionale spelers om die bal raak te vang. Hulle word immers daarvoor betaal.

Die Namibiërs speel volgende teen die All Blacks en ’n mens vermoed dat die Nieu-Seelanders lag-lag 80 punte teen die Suidwes-Afrikaners kan opstapel.

Daarteenoor het die Bokke hul eerste punte in Groep B van die toernooi gekry – die bonuspunt was reeds in die eerste helfte in die sakkie. Maar hulle sal nie soveel geleenthede teen ander spanne kry nie; en ’n Engeland of ’n Wallis sal die Bokke straf as hulle soveel hanteerblapse begaan.

’n Oorwinning is dus ’n oorwinning. Maar gaan Erasmus tevrede wees? Aikôna.

  • Puntemakers:

Springbokke: Drieë: Bongi Mbonambi (2), Makazole Mapimpi (2), Francois Louw, Lukhanyo Am, Warrick Gelant, Siya Kolisi, Schalk Brits. Doelskoppe: Elton Jantjies (6).

Namibië: Strafskop: Cliven Loubser.

  • Die Bokke se volgende wedstryd is komende Vrydag teen Italië om 11:45.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Swartwolf

Stem saam met die artikel. Bok wen, maar niks on oor opgewonde te raak nie. Ten minste kon die kwota kaptein ook ‘n drie druk onder goeie leierskap en ambassadeurskap vir die sport (einde van wedstryd) van Schalk Brits. Hoop hy het iets geleer van respek en groot hartigheid.

Jan

Verder af op MM onder draadloos, is daar ‘n foto van ‘n mooi jong nooi wat bid- dit is al wat ek kan sê.

Dubbelloop

‘n Wen is n wen, maar dit was maar ‘n saai wedstryd. Die bokspan het gelyk of hulle nog nooit saamgespeel of geoefen het nie. Daar kan baie fout gevind word en rêrig min ligpunte. Kombinasies wat werk is steeds n kopseer. Rassie moet nou sy finale span kies en laat hulle maar saamspeel. Hoe gouer, hoe beter.

Poot

Swak wedstryd. Het beter besluite en afronding van die bokke verwag. En dan weer die “ref”….. genade, sedert watter wedstryd word daar vryskoppe gegee vir ñ bal wat skeef by ñ skrum ingegooi word. Neewat die Franse skeidstegters het die klits kwyt.

Johann cb

Ek kan stééds nie insien hoekom gewese spelers toegelaat word om vir die Bokke te speel nie! Hulle soek hul heil Oorsee, kom terug, maak span en gaan weer Oorsee! Werk nie vir my nie!