Bokke het nie verdien om te verloor nie, of het hulle?

Malcolm Marx, oomblikke voordat hy die bal na Jean-Luc du Preez laat loop wat gaan druk het. (Foto Twitter @Springboks)

Dit was hartverskeurend.

Trouens, dit was erger as om jou suster te soen, soos daar na die twee onlangse gelykopuitslae teen die Wallabies verwys is.

Maar die Springbokke het oplaas ʼn punt bewys. Hulle het oplaas die rugby gespeel waarop daar so lank gewag is, en hulle het baie van ons stil gespeel.

Die Bokke het Saterdag op Nuweland hul beste vertoning van die afgelope paar jaar gelewer, maar die All Blacks kon steeds met 25-24 deurskraap nadat hulle rustyd met 8-3 voor was in die toets in die Rugbykampioenskap.

Hoe word daar gesê: Die kenmerk van ʼn goeie span is om te bly wen, al word hulle byna van hul voete af gespeel.

Daar was groot vreugde in die All Blacks se kamp toe die eindfluitjie geblaas het. Daar was eintlik maar min vir hulle op die spel, maar hulle het hul hande in die lug gegooi en mekaar omhels  toe die plaasvervanger-losskakel, Lima Sopoaga, die bal uitgeskop het.

Nou die groot vraag: Hoekom het die Bokke nie so teen die Wallabies gespeel nie?

Hoekom het dit byna twee jaar gevat om met soveel passie te speel, soveel veggees te toon, om die basiese beginsels so goed uit te voer, om rotsvas te verdedig, om mekaar te ondersteun en hul lywe vir mekaar op die spel te plaas?

Die Bok-pak was ysters, met Malcolm Marx vooraan.

Hoe die besluitnemers die speler van die wedstryd-eerbewys aan die vlugvoetige All Blacks-heelagter, Damian McKenzie, en nie aan Marx gegee het nie, sal net hulle weet.

Ja,  McKenzie het die wendrie gedruk, en hy het ʼn hele paar keer die Bok-verdedigers geflous. Maar beter as Marx? Aikôna.

Saam met Marx was Steven Kitshoff, Eben Etzebeth, Lood de Jager en Pieter-Steph du Toit skitterend op die aanval en verdediging. Eintlik die hele pak en die bank. Hulle het geskrum, gespring, gedryf en gemaal, en hulle het die All Blacks ʼn paar lesse geleer.

Die agterlyn het ʼn hele paar keer oor die voordeellyn gekom. Ja, Elton Jantjies het verbrou toe sy skop deur Beauden Barrett afgestorm is en dit tot Ryan Crotty  se drie gelei het.

En ja, Ross Cronje het dalk te veel en te diep geskop en ja, toe dit wel saakgemaak het, is een of twee duikslae gemis.

Maar hopelik het die wiel nou gedraai.

Maar nou ook die negatiewe: weer Ruan Dreyer se skrumwerk, of eerder die strafskoppe wat hy afgestaan het. Ook die oomblik van waansin toe Damian de Allende ʼn rooikaart  diep in die tweede helfte gekry het toe hy Sopoaga laat met die elmboog geloop het.

Dit was kras. Sopoaga het ʼn Oscar verdien, maar dit wás laat. Dit het boonop tot die strafdoel gelei wat die All Blacks met 25-18 laat voorloop het en op die ou einde laat wen het.

Nog negatiewe? Byna niks nie, want die Bokke het byna die onmoontlike verwag.

Ek hoop van harte die Bokbestuur het nou gesien wie die beste span en spelers is.

Puntemakers

Suid-Afrika (3) 24: Drieë: Ross Cronje, Malcom Marx, Jean-Luc du Preez. Doelskoppe: Elton Jantjies, Handré Pollard. Strafdoel: Jantjies.
Nieu-Seeland (8) 25: Drieë: Ryan Crotty, Damian McKenzie, Rieko Ioane. Doelskoppe: Lima Sopoaga 2. Strafdoele: Beauden Barrett, Sopoaga.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
PhilipGersbach

Julle sal dit nie plaas nie want dit is polities nie korrek [email protected]

Twee minder B E E spelers!! Beast en Cassiem en wat n verskil ????

Lol

Waarom geen krediet aan afrigters oor keuses van Pieter-Steph du Toit en Louw uit posisie en briljant gedoen?

Frans C

De Allende sorg toe vir die Bokke se ellende.Lyk my afrigter is behep met die man.

SjN

Marx moes man van die wedstryd gewees het, Rooikaart was onnodig, te veel doellose skoppe en n paar misvatte , te veel voorspelers in agterlyn, baie beter wedstryd gewees as verlede week, moet punte neem as dit binne skop afstand is, verstaan nie hoekom hulle lyn toe skop of skrum nie, die bal kan afgeneem word, en dit gebeur nogal baie in wedstryde, tik en dryf en maak bal vas, kan dan beide kante toe laat loop. Sterkte vorentoe

Stephanus

Was Kolisi op die veld????