Bokke steeds op hul kreeftegang

Soos in die eerste toets teen die Poemas was daar Saterdag weer nie vir André Esterhuyzen deurkomkans nie. (Foto: GB Jordaan)

Dit help nie om doekies om te draai nie, Springbokrugby is steeds in die maalgat van agteruitgang.

Dit het die Argentynse Poemas Saterdagaand in Mendoza weer onderstreep toe hulle die Springbokke in die Rugbykampioenskap met 32-19 geklop het nadat hulle met rustyd met 27-7 voor was.

Dit was so goed soos om die horlosie na 2015 en 2016 terug te draai toe die Poemas hul eerste twee oorwinnings oor die Bokke behaal het.

Dieselfde foute, dieselfde powere verdediging, dieselfde swak besluitneming, wilde aangeë, dieselfde gebrek aan speldissipline, en dieselfde uitslag.

Ai, en om te dink daar word gesê dat ons die All Blacks kan aandurf.

Kom ons kyk na die statistieke: die Bokke het 630 meter met die bal gevorder teenoor 380, hulle het 161 keer die bal gedra teenoor die Poemas se 90, het net 74 keer verdedig teenoor die Poemas se 149, maar hulle het steeds vier drieë teenoor drie afgestaan en wéér verloor.

Waar is die verdedigingspatroon waarvan daar soveel gewag gemaak is?

Waar is die spelskeppende vermoë van ʼn binnesenter? Hoekom word daar nie pale toe geskop nie as daar nie een nie, maar drie lynstane verloor word?

Is die Poemas werklik ʼn krag in wêreldrugby, of is Springbokrugby steeds op sy kreeftegang?

Ja, dis nie die einde van die wêreld nie. Die groter prentjie is aanstaande jaar se Wêreldbeker-toernooi in Japan. Maar wat van momentum en kontinuïteit?

Nee, dis maar weer terug tekenbord toe, want die gladde piesangskil waaroor daar gewaarsku is, het toe ʼn werklikheid geword.

Puntemakers ‒
Argentinië: (27) 32:
Drieë: Bautista Delguy (2), Nicolás Sánchez, Ramiro Moyano. Doelskoppe: Sánchez (3). Strafdoel: Sánchez. Skepdoel: Sánchez.
Suid-Afrika: (7) 19: Drieë: Siya Kolisi, Lionel Mapoe (2). Doelskoppe: Handré Pollard (2).

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

62 Kommentare

jongste oudste gewildste
JC

Nie snaaks nie. Daar is goeie spelers in die span, maar die beter spelers word nie gekies nie. Word wakker Rassie.

Rupert Ashford

Maak vrede daarmee. SA Rugby is getransformeer en sal van nou af rondom nommer 5 op die ranglys rondhang wanneer dit goed gaan. 3de of 4de in vanjaar se Rugbykampioenskap?

kolle

Maar ons jaag ‘n beter coach, wat net 3 toetse vir die hele jaar verloor het, weg soos ‘n hond….

Wesley

Uiters swak. Rassie kan nie heeltyd die blaam vat in die perskonferensie na die tyd nie. Tyd dat spelers die verantwoordelikheid vat. Jaag hul vir fiksheid of iets, as hul wil soos skoolseuns speel, dan hanteer hul so. Begin sommer by jou kaptein, dan by no. 10, om by 15 en so by 3 en 4. Swakste vertoning deur daai spelers ooit, en dan gepaard met die hele klomp van hul.

Bokkapater wat nou my mater?
Aanvaar nou maar die arme bokkie moet af! Ons sal nooit weer Springbok rugby sien soos ons hom gesien het in die jare toe die spelers trots was om SPRINGBOK RUGBY te speel! Ons is nêrens in wereld rugby nie en gaan ook nêrens kom nie!
Vervang maar die Bok met n kondoom want dit is waarheen hulle met die bok se naam gaan!