Die Springbokke speel vanaand in Parys teen die All Blacks in die eindstryd van die Rugbywêreldbeker. (Foto: Twitter/Springbokke)
Vanaand se Wêreldbeker-eindstryd op die Stade de France tussen wêreldrugby se twee grootste aartsvyande beloof om een te wees wat sportliefhebbers lank sal onthou.
Suid-Afrika en Nieu-Seeland se rugbyspanne is ongetwyfeld gebou vir Wêreldbeker-toernooie. Al twee lande het reeds drie keer die Webb Ellis-trofee omhoog gehou, terwyl die All Blacks in 2015 die eerste span geword het om sy titel suksesvol te verdedig toe hulle vir Australië op Twickenham geklop het.
Maar hier volg ʼn tikkie opbouende nuus so op ʼn Saterdagmiddag: Die Springbokke het nog nooit in ʼn Wêreldbeker-eindstryd verloor nie, terwyl die All Blacks in 1995 teen die einste Suid-Afrikaners op Ellispark vasgeval het.
“Ek onthou die 1995-eindstryd baie goed. Ek onthou hoe ons almal ná afloop van die wedstryd feesgevier het,” het Jacques Nienaber gesê.
Maar selfs met die euforie wat met die Ellispark-triomf gepaardgegaan het, meen Nienaber dat vanaand se aksie waarskynlik in een van die grootste rugbywedstryde nóg kan ontaard.
Mzwandile Stick stem met sy hoofafrigter saam.
“Ons leef om in wedstryde soos dié te speel; dit gaan oor die Suid-Afrikaners wat daarvan droom om in ons posisie te wees. Ons gaan alles in ons vermoë doen om hulle te laat glimlag,” het die Springbok-hulpafrigter gesê.
Your #Springboks team for the Rugby World Cup Final against New Zealand in Paris tomorrow ????????#StrongerTogether #RWC2023 pic.twitter.com/K46c9aApVd
— Springboks (@Springboks) October 27, 2023
ʼn Paar wenkbroue het weliswaar vandeesweek gelig toe die Suid-Afrikaners aankondig dat hulle weer met sewe voorspelers op die plaasvervangersbank sal speel.
Nienaber het egter vertroue in sy spelers se vermoëns.
“Ons het die 23 spelers met ʼn rede gekies en ons glo dat hulle op hul beste sal wees om ons Wêreldkampioen-titel suksesvol te verdedig.”
All Blacks-afrigter Ian Foster het ook aangedui dat hy nie ʼn probleem met die Bokke se bankkrag het nie.
“Dit is waarom ek so mal is oor rugby – ʼn mens probeer verskillende dinge om te wen. Die Springbokke se strategie pas hul manier van speel, terwyl ons ook op ons sterk punte fokus. Dit beloof om ʼn baie interessante wedstryd te wees.”
Die kragmeting begin vanaand om 21:00 en die aksie word regstreeks op SuperSport uitgesaai.
- Opmars na die eindstryd:
Suid-Afrika:
18–3 teen Skotland
76–0 teen Roemenië
8–13 teen Ierland
49–18 teen Tonga
29–28 teen Frankryk (kwarteindstryd)
16–15 teen Engeland (halfeindstryd)
Nieu-Seeland:
13–27 teen Frankryk
71–3 teen Namibië
96–17 teen Italië
73–0 teen Uruguay
28–24 teen Ierland (kwarteindstryd)
44–6 teen Argentinië (halfeindstryd)
Springbokke: Damian Willemse (heelagter), Kurt-Lee Arendse (regtervleuel), Jesse Kriel (buitesenter), Damian de Allende (binnesenter), Cheslin Kolbe (linkervleuel), Handré Pollard (losskakel), Faf de Klerk (skrumskakel), Duane Vermeulen (agtsteman), Pieter-Steph du Toit (flank), Siya Kolisi (kaptein en flank), Franco Mostert (slot), Eben Etzebeth (slot), Frans Malherbe (stut), Bongi Mbonambi (haker) en Steven Kitshoff (stut). Plaasvervangersbank: Deon Fourie, Ox Nche, Trevor Nyakane, Jean Kleyn, RG Snyman, Kwagga Smith, Jasper Wiese en Willie le Roux.
All Blacks: Beauden Barrett (heelagter), Will Jordan (regtervleuel), Rieko Ioane (buitesenter), Jordie Barrett (binnesenter), Mark Tele’a (linkervleuel), Richie Mo’unga (losskakel), Aaron Smith (skrumskakel), Ardie Savea (agtsteman), Sam Cane (kaptein en flank), Shannon Frizell (flank), Scott Barrett (slot), Brodie Retallick (slot), Tyrel Lomax (stut), Codie Taylor (haker) en Ethan de Groot (stut). Plaasvervangers: Samisoni Taukei’aho, Tamaiti Williams, Nepo Laulala, Sam Whitelock, Dalton Papali’i, Finlay Christie, Damian McKenzie en Anton Lienert-Brown.
