Bokseun druk ‘geniale’ wendrie in Amerika-skok

Riekert Hattingh (Foto: Seattle Seawolves)

ʼn “Geniale” drie deur die seun van ʼn gewese Springbok het bygedra tot ʼn eersterangse skok in die heel eerste eindstryd van die Amerikaanse beroepsliga, die Senior Rugbyliga (MLR).

Die Seattle Seawolves het die oorweldigende gunsteling, die Glendale Raptors, in San Diego met 23-19 verslaan (rustyd 8-7). Laasgenoemde het albei rondomtaliestryde tussen die twee spanne oortuigend gewen.

Met die telling 19-13 in Glendale se guns het, volgens die webwerf Americas Rugby News, ʼn “oomblik van genialiteit” aangebreek toe Riekert Hattingh (agsteman) met die bal aan die loop gegaan het.

Hy het eers die bal met ʼn oorslaanaangee na sy linkervleuel gestuur, dit met perfekte tydsberekening terugontvang en 40 meter genael om in die hoek oor te duik.

Die doelskop was oor, en Seattle het nog ʼn strafdoel behaal om die laaste spyker in Glendale se doodkis te slaan.

Hattingh is die seun van die oud-Bok Drikus Hattingh, en het vir die Blou Bulle onderouderdomrugby en in die opstelronde van die Curriebeker gespeel.

Hy het in 2015 na Amerika verhuis, en daar word verwag dat hy eersdaags deur die nasionale span nader getrek kan word.

Verskeie spelers van Suid-Afrikaanse afkoms het vanjaar ʼn prominente rol in die MLR gespeel, en dit sal nie vreemd opval as meer sulke spelers in die toekoms hul heil in die Nuwe Wêreld gaan soek nie.

Naas die euro en die jen kan die dollar verder bydra tot die leegslurp van die Suid-Afrikaanse spelerspoel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Rupert Ashford ·

…om nie te praat van die “push factors” nie…😉

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.