Cheeky Watson was in sy speeldae en later in sy loopbaan baie omstrede vanweë sy politieke uitsprake en oortuigings. Nou is die grootbaas van die Oostelike Provinsie Rugbyunie opnuut in die spervuur en doen hy bokspringe oor die finansiële gemors waarin die unie hom bevind.
Die OP Kings se spelers is die afgelope maand (dalk is dit maande al?) nie betaal nie. Watson het die afgelope paar weke allerhande verskonings gemaak, ook gepraat van beloftes van die “grootste borgskap ooit in Suid-Afrikaanse rugby”.
Dit sou sowat twee weke gelede aangekondig word en dan sou die spelers glo dubbele salarisse ontvang het.
Maar dit het nie gebeur nie en daar was sprake (hoewel die OP dit ontken het) dat die spelers wou staak.
Kon ons wees eerlik, niemand kan op `n honger maag rugby speel nie, om dit so uit te druk.
Dit klink al te veel “die tjek is in die pos” of “die skip is in die hawe”. Dalk word ek verkeerd bewys en dalk is daar `n groot borg – dis glo `n oorsese maatskappy – wat na vore sal tree om die OP uit sy verknorsing te red. Maar as daar nie meer geld in die bank is om jou grootste bates, die spelers, te betaal nie, watter borg sal miljoene in die unie wil belê ?
Wat meer olie op die vuur gooi, is `n verdoemende artikel oor die gewese All Black Carlos Spencer wat Woensdag in die New Zealand Herald verskyn het.
Spencer, wat die afgelope paar jaar in Suid-Afrika by die Lions en Kings gespeel en afgerig het, wil permanent na Nieu-Seeland terugkeer en hy is glo in die visier om Tana Umaga as vaardigheids-afrigter by die Blues by te staan.
Spencer beweer die OP Kings skuld hom `n hele paar maande se salaris en hy het versoek om van sy Kingskontrak onthef te word. Die Kings het sy versoek toegestaan en Watson het hom in `n verklaring sterkte toegewens en bedank vir sy bydrae.
Spencer, wat eers (onsuksesvol) die Kings se hoofrigter was, is deur Brent Janse van Rensburg vevang en Spencer het die afgelope ruk as vaardigheidsafrigter opgetree. Hy beweer die probleme het reeds verlede jaar voor Kersfees ontstaan en hy het `n Suid-Afrikaanse regspan aangestel om sy saak hier te beredder.
“Daar kom `n tyd wanneer jy genoeg gehad het,” het David Jones, `n prokureur van Auckland wat namens Spencer optree, gesê .
“Hulle skuld hom `n aansienlike bedrag en hy het hulle gereeld gejaag vir die agterstallige bedrae. Cheeky (Watson) het verlede Woensdag beloof dat die spelers betaal wou word, maar hulle is nie. Daar is `n reeks beloftes wat verbreek is.” het Jones gesê .
As die borgskap nie bestaan nie, sit die SA Rugbyunie in tamatiestraat. Wie gaan die spelers betaal en met watter spelers gaan die Kings in volgende jaar se Superreeks speel?
Toe die Kings drie jaar seisoene gelede baie omstrede in die Lions se plek tot die Super-reeks toegelaat is, het hulle heel skaflik gevaar, met Alan Solomons as hoofafrigter en `n rits aanwinste.
Nou rig Solomons in Edinburg in Skotland af en die meeste van sy aanwinste het groener weivelde gaan soek.
Die uurglas het reeds begin leegloop.
Ja Watson ++ Jou streke het jou ingehaal.
Ek hoop net jy het ook nie geld gekry nie
nou waar dink jy is die geld heen , lyk my die nuwe borg gaan die” lottery” wees
Miskien moet hy die ANC vra vir “Borge” hy het mos baie pêlle daar!!!
Elke hond kry sy dag………Watson ,jy sal n naweek kry!
ha ha ha ha haaaaaa..