Uithalerspel deur die losskakel Lionel Cronjé in die jongste ronde van die Japanse Topliga het grootliks bygedra dat die gewese Springbok-afrigter Jake White se Toyota Verblitz die tweede plek op die punteleer in die Rooi Afdeling ingeneem het.
Cronjé het Sondag 25 punte opgestapel deur drie drieë te druk en met vyf doelskoppe te slaag in sy span se sege van 55-24 oor die Coca-Cola Red Sparks.
Dis op sigself meer as die teenstanders se totale puntetelling.
Hy het voorheen Superrugby vir die Stormers, die Sharks en die Kings gespeel.
Die senter Shane Gates het ʼn drie vir NTT Shining Arcs in sy gelykop uitslag van 28-28 teen Kobelco Steelers gedruk.
Hy het die Kings in Superrugby verteenwoordig.
Die Springbok-slot Andries Bekker, wat vir Kobelco speel, is met ʼn geel kaart gestraf.
Nóg ʼn Bok, die heelagter Riaan Viljoen, het ʼn doelskop vir NTT Docomo Red Hurricanes in sy nederlaag van 12-34 teen Ricoh Black Rams oorgeklits.
