Stellenbosch is vir die soveelste keer die Westelike Provinsie se kampioen nadat hy Saterdag die bond se Superliga A gewen het.
Hy het Durbanville-Bellville in die eindstryd met 51-27 verslaan.
Durbell het die studente in die eerste helfte in toom gehou, maar toe die Maties die krane in die tweede helfte oopdraai, was daar geen keer aan hulle nie.
Die Goue Beker-houer, Valsbaai, is in die halfeindronde deur Durbell uitgeskakel.
Paarl het seker gemaak dat hy uiteindelik weer terug in die WP se senior reeks is deur die Superliga B te wen. Hy het Primrose met 26-17 geklop.
In die Superliga C het Macassar vir Busy Bee met 35-28 baasgeraak om dié afdeling te wen.
Riverstones het die Paarl-Top6-liga gewen met ʼn sege van 43-24 oor Albions; en Simondium, uit die Simonsberg-streek, het die Paarl- Onderste Ses-liga gewen deur Pêrel United met 57-7 op te dreun.