Soos verwag is, was die All Blacks heeltemal te sterk vir Italië in Saterdag se eerste jaareindwedstryd van die naweek waarby een van die Sesnasies-spanne betrokke was.
Nieu-Seeland het met 66-3 gewen. Soos ʼn mens van hulle gewoond geraak het, was hulle onstuitbaar met hul hardlooprugby en ondersteuning. Ja, dit was dieselfde All Blacks-hardlooprugby wat ‘n mens leer ken het voordat hulle teen Engeland gesukkel en teen Ierland verloor het.
Die All Blacks was rustyd reeds met 31-3 voor, en het uiteindelik met 66-3 gewen.
Dit het tien drieë ingesluit, met die heelagter Damian McKenzie en Jordie Barrett, wat die eerste keer op vleuel gespeel het, wat onderskeidelik drie en vier drieë gedruk het.
Puntemakers ‒
Italië (3) 3: Strafdoel: Tommaso Allan
Nieu-Seeland (31) 66: Drieë: TJ Perenara, Damian McKenzie (3), Jordie Barrett (4), Ngani Laumape, Beauden Barrett. Doelskoppe: Beauden Barrett (5), Richie Mo’unga (3)