Dubbeldoor Matie-plesier!

Jordan Chait van Maties in aksie. Foto: Phando/Jikelo/African News Agency(ANA)

Chris Massyn – die Matie-kaptein – het voor gisteraand se Varsitybeker-eindstryd gesê dat sy span ’n paar doelwitte vir dié seisoen gehad het: Hulle wou graag die reeks onoorwonne afsluit en natuurlik wou hulle die eindstryd gewen het.

En dít is presies wat hulle gisteraand op hul tuisveld vermag het toe hulle vir Tukkies met 34-12 in die eindstryd van die gewilde studente-reeks geklop het.

In ’n stampvol Danie Craven-stadion het die tuisspan ná ’n voorsprong van 21-0 net ná rustyd gehardloop, maar die Pretorianers het goed in die tweede helfte teruggeveg danksy Dewald Naude se drie en Tinus de Beer se skopvoet.

Maar Vaughen Isaacs se rooi kaart vir ’n gevaarlike duikslag het die momentum finaal in Maties se guns geswaai en Munier Harzenberg se tweede drie was die laaste spyker in Tukkies se eindstryd-doodskis.

Dit is die tweede jaar agtereenvolgens dat Maties die Varsity-kroon dra en dit is die vyfde keer sedert die reeks in 2008 begin het dat hulle met die titel wegstap.

Vir Massyn is dit ’n gepaste wyse om sy Varsity-loopbaan te groet: Hy het in 2017 die beker saam met Tukkies gelig en nou het hy dieselfde saam met Maties vermag.

Die eindstryd mag dalk meer vir Kurt Darren se weergawe van Nkosi Sikelel’ iAfrika onthou word, maar Maties het ’n uitstekende seisoen gehad. Vóór die finaal het hulle 59 drieë en 432 punte aangeteken.

Toe die reeks in 2008 begin het, was hulle drie keer agtereenvolgens die kampioenspan. Hulle is hard op pad om dié prestasie te ewenaar.

Puntemakers:

Maties: Drieë: Johann van Niekerk (2), Munier Harzenberg (2). Doelskoppe: Jordan Chait (3). Strafskoppe: Chait (2).

Tukkies: Drieë: Dewald Naude (2). Doelskop: Tinus de Beer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

16 Kommentare

jongste oudste gewildste
Gertryda

Hoekom vra ek myself af moet sangers die volkslied sing… dis n volkslied… laat mense dit sing van pawiljoene af. Soos jammer om te sê in die verlede het volk dit by geleenthede gesing.

Herman

Is enige van Maties se spelers voltydse studente? Of is Griekwas n Sattelied Kampus van hulle?

bolla

Bly maar die beste soos die Kaapse skole-rugby ook. Is Chait die seun van die Chait (kan nie naam onthou nie) wat vroeër jare vir WP losskakel gespeel het?

bolla

Ek vra om verskoning, my kommentaar het uiteindelik verskyn, dankie.

Gertjie

Anton Chait. WP loskakel