Die verdedigende kampioen, Fidji Warriors, het Woensdag in Soeva die voortou in Wêreldrugby (WR) se Stille Oseaantoernooi geneem.
Hy het Junior Japan, wat na die eerste ronde voor was, met 28-3 onder stof geloop.
Die Fidjiane is goed op pad om die toernooi die derde keer op die ry af te wen.
Hulle was rustyd met 14-3 voor en het kort ná rustyd twee vinnige drieë ingeryg, voor ʼn fel dog puntelose stryd die res van dié helfte gekenmerk het.
Samoa A het sy eerste sege in vanjaar se reeks behaal deur met 40-10 met Tonga A af te reken.
Die Tongane was na 17 minute met 10-7 voor, maar daarna was dit eenrigting verkeer.
Samoa is nou tweede ná Fidji, Japan is derde en Tonga laaste.
Die toernooi loop Saterdag ten einde.