Folau staan by sy uitlatings

Israel Folau. Foto: AP Photo/Rick Rycroft

Die Australiese rugbybreier, Michael Cheika, het Maandag gesê dat hy nie Israel Folau vir die Wallabies kan kies nie ná die ster-heelagter se “minagtende” uitlatings op sosiale media.

Dit is die eerste keer dat Cheika met die media gesels sedert Folau – ’n uitgesproke Christen – op Instagram gesê het dat gay mense hel toe gaan tensy hulle hulself bekeer.

By dieselfde perskonferensie het die Waratahs- en Wallabies-kaptein, Michael Hooper, gesê dat hy huiwerig sal wees om weer saam met die agterspeler te speel, ná sy jongste kommentaar.

Dít kom ’n dag nadat Folau aan ’n koerant gesê het dat dit die Here se wil sal wees as hy nooit weer [rugby] sou speel nie.

In ’n onderhoud met die Sydney Morning Herald het Folau gesê dat hy in die eerste plek vir die Here leef.

“Maak nie saak wat Hy wil hê ek moet doen nie, ek glo dat sy planne vir my lewe beter is as wat ek ooit vir myself kan dink.

“As dit sy wil is dat ek nie meer speel nie, dan berus ek myself daarby. Natuurlik is ek mal oor rugby en ek sal dit beslis mis. Maar my geloof in Jesus Christus is wat eerste kom.”

Die 30-jarige Folau het gesê dat hy geensins van plan is om sy kommentaar terug te trek of daarvoor om verskoning te vra nie.

“Ek sal staan by wat die Bybel sê en ek deel dit met liefde. Ek verstaan hoe ander dit kan interpreteer, sowel as hulle reaksies, maar dit is glad nie hoe ek dit wil deel nie.”

Rugby Australië het intussen ’n amptelike aanmaning aan Folau gestuur dat hy die unie se gedragskode oortree het en dat hulle die proses aan die gang gekry het wat waarskynlik die begin van die einde van Folau se kontrakte voorspel.

Dit is nie die eerste keer dat Folau in die sop is oor sy kommentaar op sosiale media nie. In 2017 is hy deur Rugby Australië gewaarsku nadat hy hom tot dié mediaplatforms gewend het om sy misnoeë jeens gay huwelike uit te spreek.

“Ons het daaroor gepraat en Israel het ʼn bietjie té ver gegaan. Wanneer jy vir die Wallabies speel, verteenwoordig jy almal in Australië,” het Cheika gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

109 Kommentare

jongste oudste gewildste
Genieve

Verkondig die Evangelie Folau rugby is n bysaak jy staan op God se woord die mense wil mos nie die waarheid hoor nie. Judas het gevra Here sal dit ek wees wat u sal verraai en die Here het gese..jy self se so. praat jy net die waarheid ek salute jou.

Gaitsigubib

In n wereld waar almal gelyke regte het kan mens nie jou eie waardes op ander wil afdwing nie, dis egter ‘n jammerlike dag vir vryheid van spraak as jy ook nie mag se hoe jy oor hierdie sake voel nie. Om te praat oor jou geloof word nou gekrimenaliseer. Die “Christen” van vandag lees/leer nie wat in God se Woord geskrywe is nie maar wil graag daaroor debat voer. Aan watter god het jy dan jou hart gegee?

Ingrid

Wow! Respek Folau!!

Rika

Wow, dit is so awesome dat hierdie jongman God se Wil bo sy eie stel. Dat hy God se naam verheerlik en hooghou maak nie saak wat gebeur nie. hy is selfs bereid om sy rugby loopbaan op te gee. Dankie Here dat daar nog so baie mense is wat nie skaam is om te sê dat hulle U lief hiet nie.

Sofie

Mooi so Folau!