Franse blaas drie van SA se ses in Rugbykampioenskap

Romain Poite – een van vier Franse en beslis nie Suid-Afrika se gunsteling nie. (Facebook Romain Poite)

Suid-Afrika se skeidsregtersdroogte loop klaarblyklik hand-aan-hand met die vertonings van die land se nasionale span.

Net Jaco Peyper van Suid-Afrika is aangewys om ʼn wedstryd, en ook net een, in Sanzaar se Rugbykampioenskap te beheer.

Die skeidsregtersdroogte in die vier Sanzaarlande word onderstreep deur die enkele wedstryd elk wat aan Nieu-Seeland se Glen Jackson en Ben O’Keefe, en Australië se Angus Gardner toegeken is.

Dus word net vier van die 12 wedstryde van die Suidelike Halfrond se belangrikste kompetisie deur skeidsregters uit die Sanzaarlande beheer.

♦  Wat ʼn mens stomslaan, is dat nie minder nie as drie Fransmanne, Pascual Gauzere, Romain Poite en Mathieu Raynal, elk vir een wedstryd, aangestel is en Jérôme Garcès vir twee.

♦  Die Franse sal drie van Suid-Afrika se ses wedstryde in die reeks beheer.

Poite, wat met sy gereelde flaters al vir ʼn riller of twee in Springbokwedstryde verantwoordelik was, is in beheer van die Bokke se eerste wedstryd in die reeks teen Argentinië in die Nelson Mandelabaai-stadion.

Gauzere is die week daarna aan die beurt wanneer die Poemas tuis in Salta weer teen Suid-Afrika speel en Garcès blaas die Springbokke se laaste wedstryd op Nuweland teen die All Blacks.

Nigel Owens van Wallis blaas in die eerste wedstryd tussen die Springbokke en All Blacks in Albany in Nieu-Seeland; Jackson blaas die toets in Australië en in die stryd tussen die twee spanne in Bloemfontein is O’Keefe die man met die fluitjie.

♦  Wayne Barnes van Engeland is in beheer van die eerste wedstryd tussen die All Blacks en die Wallabies, en John Lacey van Ierland blaas tussen Australië en Argentinië in Canberra, en Peyper in hul wedstryd in Buenos Aires.

♦  Barnes beheer ook die Bledisloe-toets in Brisbane twee weke ná die Rugbykampioenskap se laaste wedstryd.