Hanco Germishuys het die tweede opeenvolgende wedstryd ʼn drie gedruk toe sy span, Austin Elite, in Senior Liga Rugby (MLR) met 38-50 teen Houston Sabercats verloor het.
Die gewese o.13-Cravenweekspeler van Griekwas, wat Saterdag op agsteman uitgedraf het, het gaan druk nadat hy ʼn dwarsskop opgevolg het.
Germishuys (dié keer as flank) en die oud-Pretorianer JP Eloff (NOLA Gold, binnesenter) is ná die eerste weekronde deur die webwerf Americas Rugby News in sy MLR-span van die week ingesluit.
♦ Glendale Raptors, wat deur die Amerikaanse toetsskrumskakel Shaun Davies, ʼn produk van Glenwood Boys High, Durban, aangevoer word, het Seattle Seawolves in ʼn klipharde stryd met 19-15 getroef.
♦ San Diego Legion, met twee Suid-Afrikaners in die span, het sy veldslag teen Utah Warriors met 31-24 gewen.
JP du Plessis (senter) het Superrugby vir, onder meer, die Kings gespeel, en Lance Lamprecht (bankflank) het verlede jaar nog o.19-rugby vir die Sharks gespeel.