Ghana het Saterdag in sy hoofstad, Accra, Rugby Afrika se Bronsbeker verower.
Hy het Mauritius in ʼn strawwe kragmeting met 23-17 verslaan, nadat hy rustyd met 8-5 voor was.
Ghana het in sy vorige wedstryd Rwanda met 57-0 gestoomroller.
Dié Wes-Afrikaanse land, wat die afgelope klompie jaar merkwaardig op die rugbyveld gevorder het, sal aanstaande jaar in die reeks om die Silwerbeker meeding.
Mauritius se vroeëre sege van 49-16 oor Lesotho het die tweede plek aan hom besorg.
Rwanda was derde nadat hy Lesotho met 32-22 verslaan het.