Dit het rugbyondersteuners nogal skeef laat opkyk toe ʼn Namibiese toetsslot met tien toetse agter sy naam Donderdag “weggelaat” is uit die groep vir die land se November-toetse teen Uruguay.
Ruan Ludick (23) se naam was nie daar nie, maar wel dié van sy kleinboet Adriaan (19), ook ʼn slot.
Hoewel Adriaan vroeër vanjaar op Madagaskar vir Namibië se o.20-span gespeel het, is daar tog gewonder of die name nie dalk per ongeluk omgeruil is nie.
Wat sou Ruan, wat die afgelope Britse rugbyseisoen Wallis toe gestuur is om hom verder te slyp, dan gesondig het om sy plek te verloor?
Toe, Vrydag, kom die antwoord.
Die Namibiese Rugbyunie laat weet Ruan se naam is per abuis weggelaat, en moet by die groep gevoeg word.
By die gemoedsrus vir Ruan en sy ondersteuners, is daar nou ook die vooruitsig vir die twee broers om dalk saam vir hul land in die skrum te sak.