Griekwas was Saterdag op Nuweland in Kaapstad nie mans genoeg vir die Westelike Provinsie in die reeks om die Curriebeker nie.
Die Streeptruie het die kragmeting oortuigend met 55-27 gewen (rustyd) 24-13, en is nog stewig in die derde plek op die punteleer.
Danksy ʼn onderskepdrie en twee strafdoele kon die besoekers tot in die 25ste minuut voorloop, maar daarna het die WP, wat uit die staanspoor die hef in die hand gehad het, met reëlmaat gaan druk om uiteindelik agt drieë op die telbord te plaas.
Met slegs twee wedstryde oor, is die Diamantvelders vir alle praktiese doeleindes uit die wedloop om die beker.
Die puntemakers –
WP 55 (24) – Drieë: Werner Kok (2), Caylib Oosthuizen (2), Cobus Wiese, Chad Solomon, Dean Muir, Johan du Toit. Doelskoppe: Damian Willemse (4), Robert du Preez (2). Strafdoel: Damian Willemse.
Griekwas 27 (13) – Drieë: Ederies Arendse, Renier Botha, Tertius Kruger. Doelskoppe: George Whitehead (2), Eric Zana. Strafdoele: George Whitehead (2).